អធិការបតីអាល្លឺម៉ង់ លោក Olaf Scholz កាលពីថ្ងៃអាទិត្យ ទី៣០ ខែមីនា បាននិយាយថា សហភាពអឺរ៉ុប នឹងឆ្លើយតបយ៉ាងម៉ឺងម៉ាត់ចំពោះការដំឡើងពន្ធដែលបានប្រកាសដោយប្រធានាធិបតីសហរដ្ឋអាមេរិក លោក Donald Trump ប៉ុន្តែបានសង្កត់ធ្ងន់ថា ប្លុកនេះក៏បើកចំហផងដែរក្នុងការសម្របសម្រួល។

លោក Scholz បាននិយាយនៅមុនពេលការបើកពិព័រណ៍ពាណិជ្ជកម្មនៅទីក្រុង Hanover ថា «វាច្បាស់ណាស់ថា យើងក្នុងនាមជាសហភាពអឺរ៉ុប យើងប្រតិកម្មដាច់ខាតនិងយ៉ាងច្បាស់លាស់ចំពោះគោលនយោបាយដំឡើងពន្ធរបស់សហរដ្ឋអាមេរិក។

លោក Scholz បាននិយាយថា ប៉ុន្តែប្លុកនេះ «តែងតែត្រៀមគ្រប់ពេលវេលា ដើម្បីធ្វើការសម្របសម្រួល និងមានកិច្ចសហប្រតិបត្តិការ»។ «ខ្ញុំនិយាយទៅកាន់សហរដ្ឋអាមេរិកថា គោលដៅរបស់អឺរ៉ុបនៅតែជាកិច្ចសហប្រតិបត្តិការ។ ប៉ុន្តែប្រសិនបើសហរដ្ឋអាមេរិកទុកយើងឱ្យគ្មានជម្រើស ដូចជាការដំឡើងពន្ធលើដែកថែប និងអាលុយមីញ៉ូម យើងនឹងឆ្លើយតបក្នុងនាមសហភាពអឺរ៉ុបរួបរួម»។

លោក Trump បានប្រកាសដំឡើងពន្ធលើសម្ព័ន្ធមិត្ត និងសត្រូវរបស់សហរដ្ឋអាមេរិក រួមមានការដំឡើងពន្ធ២៥ភាគរយលើការនាំចូលរថយន្ត។ ពន្ធ២៥ភាគរយរបស់សហរដ្ឋអាមេរិកលើដែកថែប និងអាលុយមីញ៉ូម មកពីជុំវិញពិភពលោក បានចូលជាធរមានកាលពីពាក់កណ្តាលខែមីនា ដោយវិធានការប្រឆាំងតបតរបស់សហភាពអឺរ៉ុប នឹងចាប់ផ្តើមនៅក្នុងខែមេសា។

ក្នុងនាមជាក្រុមហ៊ុនផលិត និងនាំចេញរថយន្តដ៏ធំមួយ ប្រទេសអាល្លឺម៉ង់ អាចរងផលប៉ះពាល់យ៉ាងខ្លាំងដោយការដំឡើពន្ធលើរថយន្ត។ ប្រទេសអាល្លឺម៉ង់ ប្តេជ្ញាឆ្លើយតបដាច់ខាតចំពោះការដំឡើងពន្ធនេះ។