មន្ត្រីអ៊ុយក្រែន បាននិយាយនៅព្រឹកថ្ងៃចន្ទនេះថា រុស្ស៊ីបានទម្លាក់គ្រាប់បែកលើទីក្រុង Kharkiv ភាគឦសានប្រទេសអ៊ុយក្រែន ពីរយប់ជាប់ៗគ្នា ដោយបានបណ្តាលឲ្យមនុស្សពីរនាក់ រងរបួស បង្កជាអគ្គិភ័យ និងខូចខាតដល់សាលាមត្តេយ្យមួយ និងផ្ទះឯកជនជាច្រើនខ្នង។

អភិបាលក្រុង Ihor Terekhov បាននិយាយថា ការវាយប្រហារលើទីក្រុង Kharkiv ដែលជាទីក្រុងធំទី ២របស់អ៊ុយក្រែន បានអូសបន្លាយពេញមួយយប់ ហើយបានវាយប្រហារលើសង្កាត់ធំជាងគេ និងចំណាស់ជាងគេបំផុតរបស់ទីក្រុងនេះ។

លោក Terekhov បាននិយាយនៅក្នុងការបង្ហោះ នៅលើកម្មវិធីផ្ញើសារ Telegram នៅម៉ោង ៥:៥៥ (ម៉ោង ០២: ៥៥ម៉ាងសកល) ព្រឹកពីថ្ងៃចន្ទនេះថា៖«មានការវាយប្រហារលើកទី ៦ នៅទីក្រុងKharkiv។

ពុំទាន់ច្បាស់ថា អ្វីទៅជាគោលដៅនៅក្នុងការវាយប្រហារដែលបានកើតឡើងមួយសប្តាហ៍ បន្ទាប់ពីបទឈប់បាញ់ជាផ្នែក ដោយសម្របសម្រួលអាមេរិកលើការវាយប្រហារលើហេដ្ឋារចនាសម្ព័ន្ធថាមពល និងសមុទ្រខ្មៅ។ ភាគីទាំងពីរ បានចោទប្រកាន់គ្នាទៅវិញទៅមកថា បានបំពានការផ្អាកវាយប្រហារបណ្តោះអាសន្ននេះ។

ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី ( Volodymyr Zelensky) កាលពីថ្ងៃអាទិត្យ បាននិយាយថា ទីក្រុងមូស្គូ បានវាយប្រហារដោយយានដ្រូនជាង ១.000 គ្រឿង ក្នុងសប្តាហ៍មុន ហើយបានអំពាវនាវឲ្យមានការឆ្លើយតបពីសហរដ្ឋអាមេរិក និងសម្ព័ន្ធមិត្តផ្សេងទៀត។ រុស្ស៊ីបាននិយាយថា យានដ្រូន របស់អ៊ុយក្រែន បានវាយប្រហារទីតាំងថាមពល កាលពីសប្តាហ៍មុន។