នាយករដ្ឋមន្ត្រី លោក Anthony Albanese បានឃើញមានការកើនឡើងនូវការគាំទ្រដល់រដ្ឋាភិបាលរបស់លោក បន្ទាប់ពីយុទ្ធនាការបោះឆ្នោតរបស់ប្រទេសអូស្ត្រាលី ចាប់ផ្ដើមប្រព្រឹត្តទៅ ដោយធ្វើឲ្យក្រុមកណ្តាលនិយមឆ្វេងនិយម គឺគណបក្សការងារ មានឱកាសកាន់តែខ្ពស់ក្នុងការទទួលបានជ័យជម្នះ នៅក្នុងការបោះឆ្នោតដែលគ្រោងធ្វើនៅថ្ងៃទី៣ ខែឧសភា។

ការស្ទង់មតិរបស់សា្ថប័ន Newspoll ដែលត្រូវបានផ្សព្វផ្សាយដោយសារព័ត៌មាន The Australian កាលពីថ្ងៃអាទិត្យ (ទី៣០ ខែមីនា) បានរកឃើញថា រដ្ឋាភិបាលរបស់លោក Albanese បាននាំមុខក្រុមប្រឆាំង គឺគណបក្សសម្ព័ន្ធជាតិសេរីនិយម ពី ៥១ភាគរយ ទៅ ៤៩ភាគរយ ដែលជាលទ្ធផលល្អបំផុត ក្នុងរយៈពេល ៩ខែ ដោយលទ្ធផលនៃការពេញចិត្តផ្ទាល់ខ្លួន ចំពោះលោកនាយករដ្ឋមន្ត្រី ក៏កើនឡើងផងដែរ។

នៅក្នុងការស្ទង់មតិចុងក្រោយ នាពាក់កណ្តាលខែមីនា ស្ថាប័ន Newspoll បានរកឃើញថា គណបក្សការងារ កំពុងតាមពីក្រោយក្រុមប្រឆាំងកណ្តាលនិយមស្ដាំនិយម ពី ៤៩ភាគរយ ទៅ ៥១ភាគរយ។

ចំណែកការស្ទង់មតិដោយសា្ថប័ន Resolve, YouGov និង Redbridge បានរកឃើញលទ្ធផលស្រដៀងគ្នានៅក្នុងការស្ទង់មតិដែលបានចេញផ្សាយក្នុងប៉ុន្មានថ្ងៃថ្មីៗនេះ ជាលទ្ធផលស្ទង់មតិដំបូងដែលបានចេញផ្សាយចាប់តាំងពីលោក Albanese ចាប់ផ្តើមយុទ្ធនាការបោះឆ្នោតរយៈពេល ៥សប្តាហ៍ កាលពីថ្ងៃទី២៨ ខែមីនា។ មេដឹកនាំអូស្ត្រាលីរូបនេះ កំពុងប្រឹងប្រែងដើម្បីក្លាយជាបុគ្គលដំបូងគេ ក្នុងរយៈពេលជាង ២ទសវត្សរ៍ ដើម្បីឈ្នះតំណែងបន្តបន្ទាប់គ្នា៕