ប្រធានាធិបតីអ៊ុយក្រែន លោក Volodymyr Zelenskiy បានអំពាវនាវកាលពីថ្ងៃចន្ទ (៣១ មីនា) ឱ្យរុស្ស៊ី ទទួលទោសចំពោះឧក្រិដ្ឋកម្មសង្រ្គាមជាង ១៨៣.០០០ករណី ដែលត្រូវបានចោទប្រកាន់ដោយអ៊ុយក្រែន ចាប់តាំងពីប្រតិបត្តិការយោធាពិសេសរបស់ទីក្រុងមូស្គូ ឆ្នាំ២០២២មក ដោយនិយាយថា យុត្តិធម៌គឺចាំបាច់ដើម្បីទប់ស្កាត់ "អំពើអាក្រក់មិនឱ្យរីករាលដាល"។

លោក Zelenskiy បានធ្វើអត្ថាធិប្បាយបែបនេះទៅកាន់កិច្ចប្រជុំកំពូលរបស់ក្រុមមន្ត្រីអឺរ៉ុប នៅទីក្រុង Bucha ភាគពាយព្យនៃរដ្ឋធានីគីវ របស់អ៊ុយក្រែន ជាទីដែលទាហានរុស្ស៊ី ត្រូវបានចោទប្រកាន់ថាបានប្រព្រឹត្តអំពើឃោរឃៅ រួមទាំងការប្រហារជីវិត ការរំលោភ និងការធ្វើទារុណកម្មជាដើម ខណៈពេលកំពុងកាន់កាប់តំបន់នោះ។

លោក Zelenskiy បាននិយាយនៅក្នុងព្រឹត្តិការណ៍មួយថា "ឧក្រិដ្ឋកម្មជាង ១៨៣.០០០ករណី ដែលទាក់ទងនឹងទង្វើរបស់រុស្ស៊ី ប្រឆាំងនឹងអ៊ុយក្រែន ត្រូវបានកត់ត្រាជាផ្លូវការ"។ លោកបន្ថែមថា ចំនួនសរុបដែលចងក្រងជាឯកសារដោយអ៊ុយក្រែន ចាប់តាំងពីខែកុម្ភៈ ឆ្នាំ២០២២មក មិនបានរាប់បញ្ចូលទឹកដីអ៊ុយក្រែនភាគច្រើនដែលរុស្ស៊ីកំពុងកាន់កាប់បច្ចុប្បន្នឡើយ។

រុស្ស៊ីមិនបានអត្ថាធិប្បាយតបភ្លាមៗទេលើការលើកឡើងរបស់លោក Zelenskiy នេះទេ ប៉ុន្តែពីមុនបានបដិសេធថា ទាហានរបស់ខ្លួនមិនបានប្រព្រឹត្តអំពើឃោរឃៅអ្វីឡើយ ហើយចោទលោកខាងលិច ថាមិនអើពើនឹងឧក្រិដ្ឋកម្មរបស់អ៊ុយក្រែន នៅក្នុងការចោទប្រកាន់ដែលត្រូវបានបដិសេធដោយទីក្រុងគីវ៕