យោធាអ៊ីស្រាអែល នឹងពង្រីកប្រតិបត្តិការជើងគោករបស់ខ្លួននៅតំបន់ហ្កាហ្សា ដើម្បីកាន់កាប់ទឹកដី ២៥% នៃតំបន់ហ៊ុមព័ទ្ធនេះ ក្នុងរយៈពេល ២ ទៅ ៣ សប្តាហ៍ខាងមុខ នេះបើតាមការបញ្ជាក់របស់មន្ត្រីជាន់ខ្ពស់អ៊ីស្រាអែលនៅក្នុងបទសម្ភាសន៍មួយកាលពីថ្ងៃចន្ទ (៣១ មីនា)។

ក្រុមមន្ត្រីអ៊ីស្រាអែលនិយាយថា ប្រតិបត្តិការថ្មើរជើងគឺជាផ្នែកនៃយុទ្ធនាការ "សម្ពាធអតិបរមា" ដែលមានបំណងបង្ខំក្រុមហាម៉ាស ឱ្យយល់ព្រមដោះលែងចំណាប់ថ្នូរបន្ថែមទៀត។ ប៉ុន្តែការកាន់កាប់ឡើងវិញនោះ អាចហួសពីគោលបំណងសង្រ្គាមដែលបានបញ្ជាក់របស់អ៊ីស្រាអែល ហើយអាចដើរតួជាលេសសម្រាប់ការរុញច្រានពលរដ្ឋប៉ាឡេស្ទីនឱ្យចាកចេញពីហ្កាហ្សា។

វិធានការដែលចាប់ផ្តើមរួចទៅហើយនោះ គឺជាការបង្ខំឱ្យភៀសខ្លួនម្តងទៀតលើជនស៊ីវិលប៉ាឡេស្ទីន ដែលត្រឡប់ទៅផ្ទះសម្បែងវិញនៅភាគខាងជើង និងភាគខាងត្បូងតំបន់ហ្កាហ្សា បន្ទាប់ពីបទឈប់បាញ់ កាលពីខែមករា។ ប្រសិនបើពុំមានកិច្ចព្រមព្រៀងដោះលែងចំណាប់ថ្នូរ និងបទឈប់បាញ់ថ្មីទេ ប្រតិបត្តិការជើងគោកអាចពង្រីក និងនាំទៅដល់ការកាន់កាប់ឡើងវិញនូវទឹកដីហ្កាហ្សាភាគច្រើន និងការភៀសរបស់ជនស៊ីវិលប៉ាឡេស្ទីនភាគច្រើននៃតួលេខ ២លាននាក់ដែលរស់នៅទីនោះ ឱ្យទៅកាន់ "តំបន់មនុស្សធម៌" ដ៏តូចចង្អៀត។

មន្ត្រីអ៊ីស្រាអែលមួយចំនួននិយាយថា ការកាន់កាប់ឡើងវិញគឺជាជំហានឆ្ពោះទៅរកការអនុវត្តផែនការរបស់រដ្ឋាភិបាលសម្រាប់ "ការចាកចេញដោយស្ម័គ្រចិត្ត" របស់ប៉ាឡេស្ទីនពីតំបន់ហ្កាហ្សា ហើយចាំបាច់ដើម្បីកម្ចាត់ក្រុមហាម៉ាស។ អ្នកផ្សេងទៀតព្រមានថា នេះអាចទុកឱ្យអ៊ីស្រាអែល ជាអ្នកទទួលខុសត្រូវលើជនជាតិប៉ាឡេស្ទីន ២លាននាក់ នៅក្នុងអ្វីដែលអាចក្លាយទៅជាការកាន់កាប់គ្មានកំណត់៕