ចំហេះព្រៃមួយកន្លែងបានផ្ទុះឡើងនៅកណ្តាលរដ្ឋកាលីហ្វ័រនីញ៉ា (California) សហរដ្ឋអាមេរិក កាលពីចុងសប្តាហ៍ ហើយបានរីករាលដាលយ៉ាងឆាប់រហ័សដល់ផ្ទៃដីរាប់គីឡូម៉ែត្រក្រឡា គិតត្រឹមថ្ងៃចន្ទ ៣១ មីនា ដោយជំរុញឱ្យមានការជម្លៀសចេញរាប់រយគ្រួសារនៅតាមតំបន់ជាច្រើន។

តាមប្រភពពីភ្នាក់ងារពន្លត់អគ្គិភ័យ Cal Fire ប្រចាំរដ្ឋបានឱ្យដឹងថា ចំហេះដែលត្រូវគេដាក់ឈ្មោះថា Silver Fire នេះ បានឆាបឆេះនៅវេលាម៉ោងជាង ២រសៀល (ម៉ោងក្នុងស្រុក) កាលពីថ្ងៃអាទិត្យចុងសប្ដាហ៍ នៅតំបន់ Inyo ជិតព្រំដែនរដ្ឋ California ជាមួយរដ្ឋ Nevada ហើយបានកើនឡើងយ៉ាងឆាប់រហ័សដល់ជាង ៤គីឡូម៉ែត្រក្រឡា ក្នុងពេល ៦ម៉ោង។

កាលពីព្រឹកថ្ងៃចន្ទ Cal Fire និយាយថា អណ្ដាតភ្លើងបានរាលដាលដល់ជាង ៥គីឡូម៉ែត្រក្រឡាហើយ ដោយអ្នកពន្លត់អគ្គិភ័យជាង ២០០នាក់ មិនទាន់អាចទប់ស្កាត់បាននៅឡើយ ខណៈខ្យល់បក់ខ្លាំងក្នុងល្បឿនជាង ៥០គីឡូម៉ែត្រក្នុងមួយម៉ោង បានបញ្ឆេះកម្លាំងភ្លើង ដែល "បង្កើតលក្ខខណ្ឌគ្រោះថ្នាក់ បង្អាក់ប្រតិបត្តិការយន្តហោះពន្លត់អគ្គិភ័យ និងបង្កើនភាពស្មុគស្មាញដល់កិច្ចប្រឹងប្រែងទប់ស្កាត់"។

ការជម្លៀសត្រូវបានដាក់ចេញដល់មនុស្សប្រហែល ៨០០គ្រួសារនៅក្នុងតំបន់ប៉ះពាល់ជាច្រើន ហើយផ្លូវហាយវេ ៦ខ្សែរបស់អាមេរិក ប្រវែងប្រហែល ៥០គីឡូម៉ែត្រត្រូវបានបិទ ដោយអាជ្ញាធរព្រមានអ្នកស្រុកឱ្យប្រុងប្រយ័ត្នខ្ពស់ និងកំពុងស៊ើបអង្កេតមូលហេតុចំហេះ។ គួររម្លឹកថា កាលពីដើមឆ្នាំនេះ ទីក្រុង ដ៏ធំបំផុតរបស់រដ្ឋ California គឺក្រុង ឡូសអាន់ជឺឡេស បានរងគ្រោះក្នុងចំហេះព្រៃដ៏អាក្រក់បំផុតក្នុងប្រវត្តិសាស្ត្រ ដោយបានសម្លាប់រាប់សិបនាក់ និងបំផ្លាញរចនាសម្ព័ន្ធជាង ១៦.០០០កន្លែង៕