មេធាវីតំណាងឱ្យជននិរទេសវេណេស៊ុយអេឡា ដែលត្រូវបានបញ្ជូនពីសហរដ្ឋអាមេរិក ទៅកាន់ប្រទេសអែលសាល់វ៉ាឌ័រ កាលពីថ្ងៃចន្ទ(៣១ មីនា)បានស្នើសុំព័ត៌មានទៅកាន់ការិយាល័យរដ្ឋអាជ្ញារបស់ប្រទេសអាមេរិកកណ្តាលទាក់ទងទៅនឹងស្ថានភាពរបស់កូនក្តីពួកគេ នៅក្នុងពន្ធនាគារធំប្រឆាំងភេរវកម្ម ។

មេធាវីអែលសាល់វ៉ាឌ័រ លោក Jaime Ortega និង លោក Salvador Rios បានដាក់ញត្តិទៅការិយាល័យ សម្រាប់ការការពារសិទ្ធិមនុស្ស Ombudsman របស់ប្រទេស ដើម្បីផ្ទៀងផ្ទាត់បញ្ជីឈ្មោះជនជាតិ វេណេស៊ុយអេឡា ដែលពួកគេតំណាងឱ្យជាអ្នកដែលត្រូវបានឃុំខ្លួននៅក្នុងពន្ធនាគារប្រឆាំងភេរវកម្ម CECOT ដោយចង់ដឹងអំពីស្ថានភាពសុខភាពរបស់ពួកគេ និងដើម្បីទាមទារបណ្តាញទំនាក់ទំនងជាមួយសាច់ញាតិពួកគេ។

ក្រុមមេធាវី បានសង្កត់ធ្ងន់ថាកូនក្តីរបស់ពួកគេយ៉ាងហោចណាស់២៧នាក់ ពុំមានកំណត់ត្រាឧក្រិដ្ឋកម្មនៅក្នុងប្រទេសវេណេស៊ុយអេឡាទេ ហើយសហរដ្ឋអាមេរិក មិនបានផ្តល់ភស្តុតាងណាមួយដើម្បីគាំទ្រដល់ការចោទប្រកាន់របស់ខ្លួនដែលថាពួកគេជាសមាជិកអង្គការឧក្រិដ្ឋកម្ម។ លោក Ortega និង លោក Rios តំណាងឱ្យជនជាតិវេណេស៊ុយអេឡា៣០នាក់ក្នុងចំណោម២៣៨នាក់ ដែលសហរដ្ឋអាមេរិក បាននិរទេសទៅកាន់ប្រទេសអាមេរិកកណ្តាល កាលពីដើមខែមីនា។

ក្រសួងការបរទេសសហរដ្ឋអាមេរិក បាននិយាយកាលពីថ្ងៃចន្ទថា រដ្ឋបាល របស់លោកTrump បាននិរទេសជនជាតិវ៉េណេស៊ុយអេឡាបន្ថែមទៀត និងសមាជិកក្រុមជនអន្ធពាល MS-13 ទៅកាន់ប្រទេសអែលសាល់វ៉ាឌ័រ កាលពីចុងសប្តាហ៍ ទោះបីជាមានសំណួរជាច្រើនកើនឡើងនៅក្នុងបញ្ហាប្រឈមផ្លូវច្បាប់លើដំណើរការដើម្បីកំណត់សមាជិកក្រុមជនអន្ធពាលក៏ដោយ។