រដ្ឋមន្ត្រីការបរទេសចិនលោក វ៉ាង យី (Wang Yi) បានប្រាប់ទីភ្នាក់ងារសារព័ត៌មានរដ្ឋ RIA របស់រុស្ស៊ីនៅក្នុងការអត្ថាធិប្បាយ ដែលបានចេញផ្សាយនៅថ្ងៃអង្គារនេះថា ប្រទេសរុស្ស៊ី និងសហរដ្ឋអាមេរិក បានបោះជំហានដំបូងឆ្ពោះទៅរកការធ្វើប្រក្រតីភាពទំនាក់ទំនង ដែលជំរុញឲ្យមានសុទិដ្ឋិនិយម។

សារព័ត៌មាន RIA បានដកស្រង់សម្តីលោក វ៉ាង ដែលបាននិយាយថា៖«រុស្ស៊ី និងសហរដ្ឋអាមេរិក បានបោះជំហានដំបូងឆ្ពោះទៅរកការធ្វើឲ្យទំនាក់ទំនងមានលក្ខណៈធម្មតាឡើងវិញ ដែលជាការល្អសម្រាប់ការធ្វើឲ្យតុល្យភាពអំណាចរវាងមហាអំណាចធំៗមានស្ថិរភាព និងជំរុញឲ្យមានសុទិដ្ឋិនិយម ក្នុងស្ថានភាពអន្តរជាតិ ដែលកំពុងតែមានភាពស្មុកស្មាញ»។

លោក វ៉ាង កំពុងបំពេញទស្សនកិច្ចរយៈពេលបីថ្ងៃ ទៅកាន់ទីក្រុងមូស្គូសម្រាប់កិច្ចពិភាក្សាកិច្ចសហប្រតិបត្តិការជាយុទ្ធសាស្ត្រ ដែលហ៊ុមព័ទ្ធដោយភាពមិនច្បាស់លាស់ជុំវិញបទឈប់បាញ់ជាផ្នែក នៅក្នុងប្រទេសអ៊ុយក្រែន ហើយប្រធានាធិបតីអាមេរិកលោក ដូណាល់ ត្រាំ (Donald Trump) បានរិះគន់មេដឹកនាំរុស្ស៊ី និងអ៊ុយក្រែន។

លោក បានប្រាប់សារព័ត៌មាន RIA នៅក្នុងបទសម្ភាសន៍ទូលំទូលាយមួយថា ប្រទេសចិន អំពាវនាវឲ្យមានការចរចាសន្តិភាព បន្តទៅមុខ។

លោក វ៉ាង បាននិយាយថា៖«ទោះបីជំហានឆ្ពោះទៅរកសន្តិភាព មិនធំក៏ដោយ វាមានលក្ខណៈស្ថាបនា ហើយពិតជាមានតម្លៃណាស់ ក្នុងការកសាងសន្តិភាព។ «ប្រសិនបើមានសន្តិភាព ពុំមានការឈឺចាប់តទៅទៀតឡើយ ដូច្នេះអ្នកត្រូវប្រឹងប្រែងធ្វើយ៉ាងណាឲ្យសម្រេចបាននូវសន្តិភាព។

គួរបញ្ជាក់ផងដែរ ប្រទេសចិន និងរុស្ស៊ី បានប្រកាសភាពជាដៃគូយុទ្ធសាស្ត្រ «គ្មានដែនកំណត់» ប៉ុន្មានថ្ងៃ មុនពេលប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជូនទាហានរាប់ម៉ឺននាក់ចូលទៅអ៊ុយក្រែន ក្នុងខែកុម្ភៈ ឆ្នាំ ២០២២។