សហរដ្ឋអាមេរិក កាលពីថ្ងៃចន្ទ (ទី៣១ ខែមីនា) បានហៅការបង្កើតរដ្ឋាភិបាលស៊ីរីថ្មីថា ជាជំហានដ៏វិជ្ជមាន ប៉ុន្តែបាននិយាយថា ខ្លួននឹងមិនបន្ធូរបន្ថយទណ្ឌកម្មទេ រហូតទាល់តែបានផ្ទៀងផ្ទាត់នូវវឌ្ឍនភាពលើអាទិភាពនានា ដែលរួមមានទាំងការធ្វើសកម្មភាពប្រឆាំងនឹង «អំពើភេរវកម្ម» ផងដែរ។

គួរបញ្ជាក់ថា ប្រធានាធិបតីបណ្តោះអាសន្នស៊ីរី លោក Ahmed al-Sharaa កាលពីថ្ងៃទី២៩ ខែមីនា បានតែងតាំងរដ្ឋាភិបាលថ្មីដែលភាគច្រើនជាជនមូស្លីមនិកាយស៊ុននី ជាការផ្លាស់ប្តូរយ៉ាងខ្លាំង បន្ទាប់ពីបានផ្តួលរំលំមេដឹកនាំយូរអង្វែង លោក Bashar al-Assad ដែលជាសមាជិកនៃជនជាតិភាគតិច Alawite។

អ្នកនាំពាក្យក្រសួងការបរទេស លោកស្រី Tammy Bruce បានប្រាប់អ្នកសារព័ត៌មានថា៖ «យើងទទួលស្គាល់ការតស៊ូរបស់ប្រជាជនស៊ីរីដែលបានរងទុក្ខជាច្រើនទសវត្សរ៍ ក្រោមការគ្រប់គ្រងយ៉ាងតឹងរ៉ឹងពីរបបលោក Assad ហើយយើងសង្ឃឹមថា ការប្រកាសរដ្ឋាភិបាលថ្មីនេះ តំណាងឲ្យជំហានវិជ្ជមាន ដើម្បីឆ្ពោះរកប្រទេសស៊ីរីមួយដ៏សុខដុមរមនា»។

លោកស្រី Bruce បានបន្ថែមថា៖ «តែទោះជាយ៉ាងណាក៏ដោយ អាជ្ញាធរបណ្តោះអាសន្នរបស់ស៊ីរី ត្រូវតែបដិសេធ និងបង្ក្រាបអំពើភេរវកម្មទាំងស្រុង ធានាឲ្យបានថា យុទ្ធជនភេរវករបរទេសត្រូវបានដកចេញពីតួនាទីផ្លូវការណាមួយ ហើយរារាំងអ៊ីរ៉ង់ និងក្រុមធ្វើសង្គ្រាមតំណាងរបស់ប្រទេសនេះកុំឲ្យទាញយកផលចំណេញពីដែនដីស៊ីរី»។

លោកស្រីបានសង្កត់ធ្ងន់ថា ជុំវិញទណ្ឌកម្ម «រាល់ការកែតម្រូវគោលនយោបាយរបស់សហរដ្ឋអាមេរិក ចំពោះអាជ្ញាធរបណ្តោះអាសន្នរបស់ប្រទេសស៊ីរី នឹងជាប់ពាក់ព័ន្ធនឹងរាល់វិធានការទាំងអស់ដែលត្រូវបានអនុវត្ត»៕