រដ្ឋបាលរបស់ប្រធានាធិបតីអាមេរិក លោក Donald Trump កាលពីថ្ងៃចន្ទ (ទី៣១ ខែមីនា) បានចេញបញ្ជីលម្អិត អំពីគោលនយោបាយ និងបទប្បញ្ញត្តិ ចំពោះបណ្ដាប្រទេសបរទេសដែលខ្លួនចាត់ទុកថា ជារបាំងពាណិជ្ជកម្ម ពោលគឺ ២ថ្ងៃមុនពេលដែលលោកផ្ដល់ផលប៉ះពាល់ដល់ដៃគូពាណិជ្ជកម្មសកល ជាមួយនឹងវិធានការពន្ធបដិការ។

របាយការណ៍ប៉ាន់ស្មានពាណិជ្ជកម្មជាតិប្រចាំឆ្នាំរបស់ការិយាល័យតំណាងពាណិជ្ជកម្មអាមេរិក (USTR) ស្តីពីរបាំងពាណិជ្ជកម្មបរទេស រាយបញ្ជីការអនុវត្តជាមធ្យមនូវអត្រាពន្ធ ចំពោះបណ្ដាប្រទេសដៃគូពាណិជ្ជកម្ម និងរបាំងមិនមែនពន្ធ រាប់ចាប់ពីបទប្បញ្ញត្តិសុវត្ថិភាពអាហារដ៏តឹងរ៉ឹង រហូតដល់តម្រូវការថាមពលកកើតឡើងវិញ និងច្បាប់លទ្ធកម្មសាធារណៈ។

ពន្ធបដិការរបស់លោក Trump ដែលរំពឹងថា នឹងប្រកាសនៅថ្ងៃទី២ ខែមេសា មានគោលបំណងធ្វើឲ្យត្រូវគ្នានឹងអត្រាពន្ធខ្ពស់របស់ប្រទេសដទៃ សម្រាប់ទំនិញជាក់លាក់ និងតបត ចំពោះរបាំងមិនមែនពន្ធដែលធ្វើឲ្យប៉ះពាល់ដល់ការនាំចេញរបស់សហរដ្ឋអាមេរិក។

កាលពីសប្តាហ៍មុន លោក Trump បានប្រកាសពន្ធ ២៥ភាគរយលើការនាំចូលរថយន្តរបស់សហរដ្ឋអាមេរិក ជាចំណាត់ការមួយ ដែលត្រូវបានធ្វើឡើងក្នុងគោលបំណងសាងឡើងវិញនូវផលិតកម្មរបស់សហរដ្ឋអាមេរិក ប៉ុន្តែដែលគំរាមកំហែងឲ្យមានការឡើងថ្លៃថ្មីភ្លាមៗ៕