នាយករដ្ឋមន្រ្តីជប៉ុនលោក Shigeru Ishiba និយាយនៅថ្ងៃអង្គារនេះថា ប្រទេសរបស់លោកនឹងបន្តជំរុញឲ្យបានខ្លាំងក្លា ធ្វើឲ្យសហរដ្ឋអាមេរិកលើកលែងពន្ធរថយន្តសម្រាប់ប្រទេសមួយនេះ ។

លោក Ishiba ដែលកំពុងព្យាយាមដោះស្រាយអត្រាឯកភាពធ្លាក់ចុះមុនការបោះឆ្នោតព្រឹទ្ធសភានៅខែកក្កដាខាងមុខនេះ ស្ថិតក្រោមសំពាធផងដែរក្នុងការទប់ទល់ជាមួយចរន្តសេដ្ឋកិច្ចពីការដំឡើងពន្ធសហរដ្ឋអាមេរិក និងការពារគ្រួសារពីការកើនឡើងការចំណាយជីវិតប្រចាំថ្ងៃ ។

លោកនិយាយថា ពាក់ព័ន្ធនឹងវិធានការដំឡើងពន្ធបន្ថែមទៀតប្រកាសកាលពីខែមុនដោយសហរដ្ឋអាមេរិកលើរថយន្ត និងផលិតផលផ្សេងទៀត ក្នុងនាមជាជប៉ុនដែលជាប្រទេសវិនិយោគទុនធំបំផុតនៅសហរដ្ឋអាមេរិក ពួកយើងនឹងបន្តជំរុញឲ្យបានខ្លាំងក្លាបំផុត ធ្វើឲ្យសហរដ្ឋអាមេរិកលើកលែងប្រទេសរបស់ពួកយើងពីការដំឡើងពន្ធ ។

លោក Ishiba បានសន្យាប្រើប្រាស់ប្រកបដោយប្រសិទ្ធិភាពថវិកា ៧៧០ពាន់លានដុល្លារ សម្រាប់ឆ្នាំសារពើពន្ធ ២០២៥ ដើម្បីដោះស្រាយអតិផរណា ក្រោយវាត្រូវបានឯកភាពដោយសភាជប៉ុនកាលពីថ្ងៃចន្ទ ។

គួរឲ្យដឹងថា កាលពីសប្តាហ៍មុន ប្រធានាធិបតីសហរដ្ឋអាមេរិកលោក Donald Trump បានបញ្ចេញផែនការដំឡើងពន្ធ ២៥ភាគរយលើការនាំចូលរថយន្ត គឺជាចំណាត់ការមួយដែលទំនងជាធ្វើឲ្យមានការប៉ះពាល់ធ្ងន់ធ្ងរដល់សេដ្ឋកិច្ចពឹងផ្អែកលើការនាំចេញរបស់ជប៉ុន ។ លោកបាននិយាយផងដែរថា លោកនឹងប្រកាសដំឡើងពន្ធបដិការមានគោលដៅលើគ្រប់ប្រទេសទាំងអស់ ៕