សារព័ត៌មាន Financial Times (FT) បានរាយការណ៍ថា រដ្ឋមន្ត្រីការបរទេសដាណឺម៉ាក លោក Lars Lokke Rasmussen គ្រោងនឹងជួបជាមួយរដ្ឋមន្ត្រីការបរទេសអាមេរិក លោក Marco Rubio ក្នុងសប្តាហ៍នេះ ដែលជាកិច្ចពិភាក្សាកម្រិតខ្ពស់លើកដំបូង ចាប់តាំងពីការជាប់ឆ្នោតឡើងវិញរបស់លោកប្រធានាធិបតី Donald Trump និងការប្តេជ្ញារបស់លោក ក្នុងការ «គ្រប់គ្រង» លើដែនដី Greenland។

ការរំពឹងទុកនៃកិច្ចពិភាក្សាបែបនេះ កើតឡើងចំពេលមានភាពតានតឹង រវាងប្រទេសទាំង២ ជុំវិញការចាប់អារម្មណ៍របស់សហរដ្ឋអាមេរិក ក្នុងការកាន់កាប់ Greenland ជាកោះអាក់ទិកដែលត្រូវបានគ្រប់គ្រងដោយដាណឺម៉ាក តាំងពីឆ្នាំ១៧២១។

ដោយដកស្រង់សម្តីពីមន្ត្រី ២រូបដែលបានប្រាប់សង្ខេបអំពីការរៀបចំនេះ សារព័ត៌មាន FT នៅថ្ងៃអង្គារ (ទី១ ខែមេសា) នេះ បានរាយការណ៍កថា ជំនួបនេះគ្រោងធ្វើឡើងនៅខាងក្រៅកិច្ចប្រជុំរដ្ឋមន្ត្រីការបរទេសរបស់អង្គការណាតូ នៅទីក្រុងប្រ៊ុចសែល ប្រទេសបែលសហ្ស៊ិក ដែលនឹងចាប់ផ្តើមនៅថ្ងៃព្រហស្បតិ៍។

តែទោះបីជាយ៉ាងណាក្ដី ក្រុមមន្ត្រីបានព្រមានថា ព្រឹត្តិការណ៍នេះអាចនឹងត្រូវលុបចោល ដោយសារតែទំនាក់ទំនងដ៏តានតឹង រវាងទីក្រុង Copenhagen និងវ៉ាស៊ីនតោន។ ក្រសួងការបរទេសអាមេរិក មិនបានឆ្លើយតបភ្លាមៗនោះឡើយ ចំពោះសំណើរបស់ទីភ្នាក់ងារសារព័ត៌មាន Reuters ដើម្បីសុំការអត្ថាធិប្បាយ៕