ភាគហ៊ុនក្នុងពិភពលោកបានធ្លាក់ចុះ ហើយវិនិយោគិនកំពុងស្វះស្វែងរកទីសុវត្ថិភាពសម្រាប់មូលបត្របំណុល មាស និងប្រាក់យ៉េនជប៉ុន នៅថ្ងៃព្រហស្បតិ៍ (០៣ មេសា) នេះ ខណៈលោកប្រធានាធិបតីអាមេរិក Donald Trump បើកបង្ហាញការដំឡើងពន្ធ ដែលមានទំហំធំជាងការរំពឹងទុក ទៅលើសេដ្ឋកិច្ចជុំវិញពិភពលោក ដោយប៉ះពាល់ពាណិជ្ជកម្ម និងខ្សែច្រវាក់ផ្គត់ផ្គង់សកល។

វិស័យបច្ចេកវិទ្យារងការវាយលុកខ្លាំងជាងគេ ខណៈមជ្ឈមណ្ឌលផលិតកម្មនៅចិន និងកោះតៃវ៉ាន់ ប្រឈមការយកពន្ធថ្មីលើស ៣០% ដែលនាំឱ្យពន្ធសរុបកើនឡើងដល់ ៥៤% លើការនាំចូលពីចិន។ ភាគហ៊ុនរបស់ Nasdaq ធ្លាក់ ៣,៣% ហើយនៅក្នុងការជួញដូរក្រោយម៉ោង ទឹកប្រាក់ប្រមាណ ៧៦០ពាន់លានដុល្លារ ត្រូវលុបចោលពីតម្លៃទីផ្សារនៃស្ថាប័នបច្ចេកវិទ្យានាំមុខគេ Magnificent Seven។ Apple រងគ្រោះខ្លាំងបំផុត ដោយហ៊ុនក្រុមហ៊ុនផលិតទូរស័ព្ទ iPhone នៅចិន ធ្លាក់ចុះជិត ៧%។

ភាគហ៊ុន S&P 500 ថយចុះ ២,៧% ហើយហ៊ុន FTSE ធ្លាក់ ១,៦% ខណៈភាគហ៊ុនអឺរ៉ុប រអិលចុះជិត ២%។ Nikkei របស់ជប៉ុន ធ្លាក់ ២,៨% ដោយក្រុមសន្ទស្សន៍ស្ទើរតែទាំងអស់បានធ្លាក់ចុះ ខណៈក្រុមហ៊ុនដឹកជញ្ជូន ធនាគារ ធានារ៉ាប់រង និងនាំចេញ បានទប់ទល់នឹងពន្ធដ៏ធំ។ សន្ទស្សន៍ធំជាងគេរបស់ MSCI នៃភាគហ៊ុនអាស៊ីប៉ាស៊ីហ្វិកនៅខាងក្រៅជប៉ុន ធ្លាក់ជាង ១%។

ភាគហ៊ុននៅកូរ៉េខាងត្បូង ចិន ក្រុងហុងកុង និងកន្លែងផ្សេងទៀតក៏ធ្លាក់ចុះផងដែរ ដោយសារកម្លាំងនៃពន្ធថ្មីរបស់អាមេរិក។ លោក Trump បានប្រកាសពន្ធមូលដ្ឋាន ១០% លើការនាំចូលទាំងអស់ ជាមួយនឹងការយកពន្ធខ្ពស់ខ្លាំងលើដៃគូពាណិជ្ជកម្មមួយចំនួន ជាពិសេសនៅអាស៊ី។ ក្រៅពីពន្ធបន្ថែមថ្មី ៣៤% លើចិន ជប៉ុនរងពន្ធ ២២៤% វៀតណាម ៤៦% និងកូរ៉េខាងត្បូង ២៥% ហើយសហភាពអឺរ៉ុប ក៏ត្រូវរងការដំឡើងពន្ធ ២០% ផងដែរ រួមទាំងប្រទេសជាច្រើនទៀត៕