គ្រោះមហន្តរាយធម្មជាតិដ៏កាចសាហាវបំផុតរបស់មីយ៉ាន់ម៉ា ក្នុងពេលជាច្រើនឆ្នាំ អាចនឹងពង្រឹងតួនាទីរបស់ឧត្តមសេនីយដែលកំពុងកាន់អំណាច គឺលោក Min Aung Hlaing តាមរយៈការបើកបណ្តាញការទូត ដែលបានបិទអស់រយៈពេល ៤ឆ្នាំមកហើយ បន្ទាប់ពីរបបសឹករបស់លោកបានបណ្តេញរដ្ឋាភិបាលជាប់ឆ្នោត និងបញ្ឆេះសង្រ្គាមស៊ីវិលដ៏តានតឹង។

នៅមុនរញ្ជួយដីកម្រិត ៧,៧រ៉ិចទ័រកាលពីសប្តាហ៍មុន ដែលបានសម្លាប់មនុស្សជាង ៣.០០០នាក់ ប្រមុខរបបសឹករូបនេះបានត្រៀមខ្លួនធ្វើទស្សនកិច្ចបរទេសដ៏កម្រមួយទៅកាន់កិច្ចប្រជុំកំពូលក្នុងតំបន់នៅប្រទេសថៃ ខណៈមន្រ្តីជំនិតបានធ្វើការតាមទូរសព្ទដើម្បីរៀបចំកិច្ចប្រជុំជាមួយមេដឹកនាំផ្សេងទៀត។

ទោះបីជាមានការបំផ្លិចបំផ្លាញនៅក្នុងប្រទេសក៏ដោយ ទូរទស្សន៍រដ្ឋមីយ៉ាន់ម៉ាបានរាយការណ៍ថា ដំណើរទស្សនកិច្ចនោះនឹងបន្តទៅមុខ ដោយលោក Min Aung Hlaing គ្រោងនឹងទៅដល់ប្រទេសថៃ នៅថ្ងៃព្រហស្បតិ៍ (០៣ មេសា) នេះ មុនពេលកិច្ចប្រជុំកំពូលរបស់ក្រុម BIMSTEC នៅទីក្រុងបាងកក នៅថ្ងៃសុក្រស្អែកនេះ។

ទស្សនកិច្ច ដែលកើតឡើងបន្ទាប់ពីមានការអាណិតអាសូរពីអន្តរជាតិបន្ទាប់ពីការរញ្ជួយដីនេះ គឺជាជំហានឆ្ពោះទៅរកការបញ្ចប់ភាពឯកោដែលដាក់ដោយមេដឹកនាំពិភពលោកភាគច្រើនជុំវិញសង្រ្គាមដែលបានជម្លៀសនុស្ស ៣,៥លាននាក់ និងធ្វើឱ្យសេដ្ឋកិច្ចធ្លាក់ចុះ។ អ្នកជំនាញនិយាយថា របបសឹកអាចប្រើវិបត្តិនេះ ដើម្បីពង្រឹងជំហររបស់ខ្លួននៅសមរភូមិប្រយុទ្ធ ព្រមទាំងផ្នែកការទូតរបស់ប្រទេស៕