ប្រទេសចិន នៅថ្ងៃព្រហស្បតិ៍ (០៣ មេសា) នេះ បានជំរុញឱ្យសហរដ្ឋអាមេរិក លុបចោលជាបន្ទាន់នូវការដំឡើងពន្ធចុងក្រោយបំផុតរបស់ខ្លួន ហើយបានប្តេជ្ញាថានឹងចាត់វិធានការតបតយ៉ាងចាស់ដៃ ដើម្បីការពារផលប្រយោជន៍ផ្ទាល់ខ្លួន បន្ទាប់ពីលោកប្រធានាធិបតីអាមេរិក Donald Trump បានប្រកាសពីការយកពន្ធលើដៃគូពាណិជ្ជកម្មទាំងអស់របស់អាមេរិក នៅជុំវិញពិភពលោក។

ក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា ចំណាត់ការរបស់ទីក្រុងវ៉ាស៊ីនតោន មិនយកចិត្តទុកដាក់លើតុល្យភាពនៃផលប្រយោជន៍ ដែលទទួលបាននៅក្នុងការចរចាពាណិជ្ជកម្មពហុភាគីក្នុងប៉ុន្មានឆ្នាំមកនេះ និងការពិតដែលថា អាមេរិកខ្លួនឯងផ្ទាល់ក៏ទទួលបានអត្ថប្រយោជន៍យ៉ាងច្រើនពីពាណិជ្ជកម្មអន្តរជាតិជាយូរមកហើយដែរ។

ក្រសួងបន្ថែមថា "ប្រទេសចិន ប្រឆាំងយ៉ាងម៉ឺងម៉ាត់ចំពោះរឿងនេះ ហើយនឹងចាត់វិធានការសងសឹកតបតយ៉ាងខ្លាំងក្លាដើម្បីការពារសិទ្ធិ និងផលប្រយោជន៍ផ្ទាល់ខ្លួន" ខណៈអាមេរិក ដែលជាប្រទេសសេដ្ឋកិច្ចធំជាងគេលើពិភពលោក ហាក់កំពុងរុញច្រានពិភពលោកឱ្យធ្លាក់កាន់តែជ្រៅទៅក្នុងសង្រ្គាមពាណិជ្ជកម្ម ដែលកំពុងប៉ះពាល់ខ្សែច្រវាក់ផ្គត់ផ្គង់សកល។

គួរឱ្យដឹងថា លោក Trump កាលពីថ្ងៃពុធ បានប្រកាសថា ចិននឹងរងការវាយប្រហារដោយពន្ធថ្មី ៣៤% បន្ថែមពីលើពន្ធ ២០% ដែលលោកបានដាក់រួចទៅហើយកាលពីដើមឆ្នាំនេះ ដែលនាំឱ្យពន្ធថ្មីសរុបឡើងដល់ ៥៤% និងជិតដល់តួលេខ ៦០% ដែលលោក Trump បានគម្រាមកំហែងនៅពេលកំពុងដំណើរការយុទ្ធនាការបោះឆ្នោត៕