ក្រសួងការបរទេសចិន កាលពីថ្ងៃពុធសប្ដាហ៍នេះ បាននិយាយថា កិច្ចសហប្រតិបត្តិការយោធា និងសន្តិសុខរវាងសហរដ្ឋអាមេរិក និងហ្វីលីពីន មិនគួរគំរាមកំហែងដល់សន្តិភាព និងសន្តិសុខក្នុងតំបន់ឡើយ។

សហរដ្ឋអាមេរិក បាននិយាយកាលពីថ្ងៃអង្គារទី ១ ខែមេសាថា ខ្លួនបានអនុម័តការលក់យន្តហោះចម្បាំង F-16 តម្លៃ៥,៥៨ពាន់លានដុល្លារទៅឱ្យប្រទេសហ្វីលីពីន ខណៈទីក្រុងវ៉ាស៊ីនតោនគាំទ្រសម្ព័ន្ធមិត្តរបស់ខ្លួនមួយនេះ ក្នុងភាពតានតឹងកំពុងកើនឡើងជាមួយប្រទេសចិន។

លោក ហ្គ័រ ចាឃុន (Guo Jiakun) អ្នកនាំពាក្យក្រសួងខាងលើរបស់ចិន បានគូសបញ្ជាក់បែបនេះ ក្នុងសន្និសីទសារព័ត៌មានជាប្រចាំ ជាការឆ្លើយតបទៅនឹងសហរដ្ឋអាមេរិក ដែលបានអនុម័តការលក់យន្តហោះចម្បាំង F-16 ទៅឲ្យប្រទេសហ្វីលីពីនកាលពីថ្ងៃអង្គារសប្ដាហ៍នេះ។

លោក Guo បាននិយាយថា ទាក់ទងនឹងកិច្ចសហប្រតិបត្តិការផ្នែកសន្តិសុខរវាងសហរដ្ឋអាមេរិក និងហ្វីលីពីន ប្រទេសចិនបានបញ្ជាក់ជំហររបស់ខ្លួនជាច្រើនដងរួចមកហើយថា កិច្ចសហប្រតិបត្តិការការពារជាតិ និងសន្តិសុខណាមួយរវាងហ្វីលីពីន និងប្រទេសដទៃទៀត មិនគួរកំណត់គោលដៅភាគីទីបី ឬប៉ះពាល់ដល់ផលប្រយោជន៍របស់ពួកគេឡើយ ដោយទុកឱ្យភាពតានតឹងក្នុងតំបន់កាន់តែធ្ងន់ធ្ងរ។

លោកបាននិយាយថា លោកជឿថាប្រទេសក្នុងតំបន់អាចមើលឃើញយ៉ាងច្បាស់ថា អ្នកណាកំពុងបង្កការប្រឈមដាក់គ្នាខាងយោធា និងប្រែក្លាយអាស៊ីទៅជាទីតាំងពោពេញដោយគ្រោះថ្នាក់៕