ការប្រកាសពន្ធពិភពលោកនៅថ្ងៃទី០២ ខែមេសា របស់លោកប្រធានាធិបតីអាមេរិក Donald Trump លើទំនិញនាំចូលបានបង្កការខឹងសម្បារទូទាំងពិភពលោក ដែលអ្នកជំនាញផ្នែកសេដ្ឋកិច្ចជាច្រើនបានព្រមានថា នឹងប៉ះពាល់ដល់អាមេរិកខ្លួនឯងផ្ទាល់ អាចនាំឱ្យតម្លៃទំនិញឡើងថ្លៃកប់ពពកសម្រាប់ជនជាតិអាមេរិក និងបញ្ឆេះការសងសឹកទៅមកយ៉ាងទូលំទូលាយ។

លោក Trump ដែលហៅថ្ងៃដាក់ពន្ធ ០២ មេសា នេះថាជា "ថ្ងៃរំដោះ" បានអះអាងថា ការយកពន្ធនឹងបង្កើនប្រាក់ចំណូលសម្រាប់រដ្ឋាភិបាល និងលើកទឹកចិត្តក្រុមហ៊ុននានាឱ្យសាងសង់រោងចក្រនៅអាមេរិក ជំនួសឱ្យការប្រើកម្លាំងពលកម្មតម្លៃថោកនៅបរទេស។ លោក Trump បន្តថា ប្រទេសនានាជុំវិញពិភពលោក បានកេងប្រយោជន៍ពីអាមេរិក ហើយពន្ធបដិការថ្មីរបស់លោក នឹងយកពន្ធលើការនាំចូលពីប្រទេសផ្សេងទៀត ដល់កម្រិតដូចគ្នាដែលពួកគេបានដាក់ចំពោះទំនិញអាមេរិក។

ទោះយ៉ាងណាក៏ដោយ អ្នករិះគន់ប្រកែកថា ពន្ធរបស់លោក Trump នឹងនាំឱ្យតម្លៃកាន់តែខ្ពស់សម្រាប់ជនជាតិអាមេរិក ខណៈក្រុមហ៊ុនដែលបង់ពន្ធនេះ នឹងបញ្ជូនការចំណាយទាំងនោះទៅលើអ្នកប្រើប្រាស់តាមរយៈការឡើងថ្លៃឥវ៉ាន់។

អ្នកខ្លះក៏ប្រកែកថា លោក Trump ប្រហែលជាមិនមានសិទ្ធិអំណាចក្នុងការកំណត់អត្រាពន្ធជាឯកតោភាគីបែបនេះបានទេ។ សូម្បីតែសមាជិកបក្សសាធារណរដ្ឋរបស់លោក Trump មួយចំនួនក៏បានប្រឆាំងនឹងពន្ធនេះដែរ ដោយនិយាយថា ការដំឡើងពន្ធលើប្រទេសដទៃគឺជាទម្រង់មួយផ្សេងទៀតនៃដាក់ពន្ធលើជនជាតិអាមេរិកខ្លួនឯងផ្ទាល់៕