មន្ត្រីសន្តិសុខហ្វីលីពីនមួយរូប បាននិយាយធានាទំនុកចិត្តដល់ទីក្រុងប៉េកាំង នៅថ្ងៃព្រហស្បតិ៍ (០៣ មេសា) នេះថា លទ្ធភាពនៃការទិញយន្តហោះ F-16 របស់ហ្វីលីពីន ពីសហរដ្ឋអាមេរិក មិនប៉ះពាល់ដល់ផលប្រយោជន៍របស់ភាគីទីបីណាមួយឡើយ រួមទាំងប្រទេសចិនផងដែរ។

អ្នកនាំពាក្យក្រុមប្រឹក្សាសន្តិសុខជាតិ លោក Jonathan Malaya បានធានាចំពោះចិនថា ការទិញដែលបានគ្រោងទុកនេះ គឺមិនមានចេតនាជាការគំរាមកំហែងដល់ប្រទេសណាមួយទេ ហើយគ្រាន់តែជាផ្នែកនៃកិច្ចខិតខំប្រឹងប្រែងរបស់ហ្វីលីពីន ដើម្បីធ្វើទំនើបកម្មយោធារបស់ខ្លួនប៉ុណ្ណោះ។

ទីភ្នាក់ងារសហប្រតិបត្តិការសន្តិសុខការពារជាតិរបស់អាមេរិក បាននិយាយកាលពីថ្ងៃអង្គារថា ក្រសួងការបរទេសបានអនុម័តលទ្ធភាពនៃការលក់ផ្នែកយោធាបរទេស ទៅឱ្យហ្វីលីពីន នូវយន្តហោះ F-16 ចំនួន ២០គ្រឿង ក្នុងតម្លៃប៉ាន់ស្មានចំនួន ៥,៥៨ពាន់លានដុល្លារ។ ហ្វីលីពីននិយាយថា រដ្ឋាភិបាលអាមេរិក មិនទាន់បញ្ជាក់ជាផ្លូវការនូវការយល់ព្រមនេះ ទៅកាន់ទីក្រុងម៉ានីលនោះទេ។

ជាការឆ្លើយតបទៅនឹងដំណឹងទិញយន្តហោះចម្បាំងនេះ ក្រសួងការបរទេសចិន បាននិយាយកាលពីថ្ងៃពុធថា កិច្ចសហប្រតិបត្តិការយោធា និងសន្តិសុខរវាងសហរដ្ឋអាមេរិក និងហ្វីលីពីន មិនគួរគំរាមកំហែងដល់សន្តិភាព និងសន្តិសុខក្នុងតំបន់ឡើយ៕