លោក Keith Kellogg ប្រេសិតពិសេសរបស់លោកប្រធានាធិបតីអាមេរិក Donald Trump ប្រចាំអ៊ុយក្រែន បានប្រាប់សារព័ត៌មាន Fox News នៅថ្ងៃពុធ (០២ មេសា) ថា សហរដ្ឋអាមេរិក មានគោលបំណងធានាបាននូវបទឈប់បាញ់ពេញលេញនៅក្នុងសង្គ្រាមដែលកំពុងបន្ត ហើយរុស្ស៊ី និងអ៊ុយក្រែន កំពុងខិតជិតដល់បទឈប់បាញ់ហើយ ប៉ុន្តែបានព្រមានថា ភាគីទាំងពីរនឹងត្រូវធ្វើការសម្របសម្រួលបន្ថែមដើម្បីឈានដល់កិច្ចព្រមព្រៀងមួយ។

លោក Kellogg បន្ថែមថា "ភាគីទាំងពីរនឹងមិនទទួលបានអ្វីគ្រប់យ៉ាងដូចដែលពួកគេចង់បានទេ"។ ទន្ទឹមនឹងនេះ លោក Trump នៅតែបន្តទាក់ទងជាមួយលោកប្រធានាធិបតីអ៊ុយក្រែន Volodymyr Zelensky និងមេដឹកនាំរុស្ស៊ី លោក Vladimir Putin ហើយលោក Trump នឹងអាចធ្វើអន្តរការីលើកិច្ចព្រមព្រៀងរវាងប្រទេសទាំងពីរផងដែរ។

គួរឱ្យដឹងថា សហរដ្ឋអាមេរិក និងអ៊ុយក្រែន បានឈានដល់កិច្ចព្រមព្រៀងមួយស្តីពីបទឈប់បាញ់ពេញលេញនៅថ្ងៃទី១១ ខែមីនា ប៉ុន្តែរុស្ស៊ីបានបដិសេធ ដោយយល់ព្រមត្រឹមតែបទឈប់បាញ់មួយផ្នែកប៉ុណ្ណោះ ដែលមិនរាប់បញ្ចូលការវាយប្រហារលើហេដ្ឋារចនាសម្ព័ន្ធថាមពល និងសកម្មភាពយោធានៅសមុទ្រខ្មៅ។

ចាប់តាំងពីពេលនោះមក ទីក្រុងគីវ បានចោទទីក្រុងមូស្គូ ថារំលោភលើការផ្អាកការវាយប្រហារទាក់ទងនឹងថាមពល ខណៈស្ថានភាពនៃបទឈប់បាញ់នៅសមុទ្រខ្មៅនៅតែមិនច្បាស់លាស់ ហើយរុស្ស៊ី នៅតែទទូចថា ការពន្យារពេលរបស់ខ្លួនគឺផ្សារភ្ជាប់ទៅនឹងការបន្ធូរបន្ថយទណ្ឌកម្មរបស់លោកខាងលិច៕