មជ្ឈមណ្ឌលព្យាករណ៍អាកាសធាតុនៃអាជ្ញាធរអន្តររដ្ឋាភិបាលទទួលបន្ទុកការអភិវឌ្ឍន៍ ដែលជាប្លុកប្រចាំតំបន់ បាននិយាយកាលពីថ្ងៃពុធថា ប្រទេសជាច្រើននៅញកអាហ្វ្រិក ត្រូវបានកំណត់ថានឹងមានភ្លៀងធ្លាក់ច្រើនជាងធម្មតានៅក្នុងប៉ុន្មានថ្ងៃខាងមុខនេះ ដែលអាចនឹងនាំឱ្យមានទឹកជំនន់។

មជ្ឈមណ្ឌល បាននិយាយនៅក្នុងការព្យាករណ៍ចុងក្រោយរបស់ខ្លួនថា ប្រទេសចំនួន៨នៅក្នុងតំបន់នឹងទទួលភ្លៀងធ្លាក់ខ្លាំង ជាមួយនឹងទឹកជំនន់ដ៏គំហុក វាយប្រហារជាចម្បងទៅលើប្រទេសតង់ហ្សានី អ៊ុយហ្គង់ដា និងប្រទេសកេនយ៉ា។ ទឹកភ្លៀងធ្លាក់ច្រើនជាងធម្មតា ត្រូវបានរំពឹងទុកលើផ្នែកមួយចំនួននៅភាគខាងជើង និងភាគខាងត្បូងប្រទេសតង់ហ្សានី ភាគខាងត្បូងប្រទេសកេនយ៉ា ភាគនិរតីប្រទេសសូម៉ាលី តំបន់ភាគខាងលិចប្រទេសរ៉្វាន់ដា ប្រទេសប៊ូរុនឌី តំបន់ភាគច្រើននៅស៊ូដង់ខាងត្បូង និងភាគខាងលិចប្រទេសអេត្យូពី ដែលបរិមាណទឹកភ្លៀងអាចមានចាប់ពី៥០ ទៅ២០០ មីលីម៉ែត្រ។

ក្នុងចំណោមប្រទេសទាំងបីនៅអាហ្រ្វិកខាងកើត ប្រទេសតង់ហ្សានី ប្រឈមហានិភ័យទឹកជំនន់ខ្ពស់បំផុត បន្ទាប់មកគឺប្រទេសអ៊ុយហ្គង់ដា និងប្រទេសកេនយ៉ា។

អង្គការស្បៀងអាហារ និងកសិកម្មនៃអង្គការសហប្រជាជាតិ បានរាយការណ៍ថា ប្រជាជនចំនួន៦៩,២លាននាក់នៅញកអាហ្វ្រិក កំពុងប្រឈមទៅនឹងអសន្តិសុខស្បៀង។ ទឹកជំនន់ ដែលត្រូវបានព្យាក ទំនងជានឹងធ្វើឱ្យវិបត្តិស្បៀងអាហារយ៉ាប់យ៉ឺនក្នុងតំបន់នេះ ដែលត្រូវបានធ្វើឱ្យកាន់តែធ្ងន់ធ្ងរ ដោយគ្រោះរាំងស្ងួត។