រដ្ឋមន្ត្រីការបរទេសលីទុយអានី លោក កេស្តូឌីស បាឌ្រី (Kestutis Budrys) បានប្រាប់ទីភ្នាក់ងារសារព័ត៌មាន RBC-Ukraine ក្នុងបទសម្ភាសន៍មួយថា បណ្តាប្រទេសនៅអឺរ៉ុប មិនអាចជំនួសសហរដ្ឋអាមេរិកទាំងស្រុងបានទេ ទាក់ទងនឹងជំនួយយោធា ដល់ប្រទេសអ៊ុយក្រែន។

លោកបានចង្អុលបង្ហាញជាការឆ្លើយតបទៅនឹងសំណួរអំពីសមត្ថភាពរបស់អឺរ៉ុប ក្នុងការបំពេញចន្លោះប្រហោងដ៏សំខាន់ ក្នុងការផ្គត់ផ្គង់របស់ទីក្រុងវ៉ាស៊ីនតោន ដល់អ៊ុយក្រែនថា៖«យើងមិនមានជំនួសសម្រាប់ការផ្គត់ផ្គង់សំខាន់ៗមួយចំនួន ពីសហរដ្ឋអាមេរិក ទៅអ៊ុយក្រែន បាននោះទេ។ យើងទាំងអស់គ្នាដឹងថា ការផ្គត់ផ្គង់ទាំងនោះ គឺជាអ្វីហើយ។ នេះគឺជាមូលហេតុដែលយើងគួរតែបន្តធ្វើការជាមួយអាមេរិក»។

យោងតាមលោក បាឌ្រី បានឲ្យដឹងថា បណ្តាប្រទេសនៅអឺរ៉ុប គួរតែពង្រឹងកិច្ចសហប្រតិបត្តិការជាមួយទីក្រុងគីវ ក្នុងវិស័យឧស្សាហកម្មការពារជាតិ ដើម្បីជំរុញការផលិតអាវុធផ្ទាល់ខ្លួនរបស់ពួកគេ។ ទោះយ៉ាងណាក៏ដោយ លោករំពឹងថា សហរដ្ឋអាមេរិកនឹង «នៅតែជាផ្នែកនៃអ្នករៀបចំផែនសន្តិសុខរបស់អឺរ៉ុបដដែល»។

ប្រធានាធិបតីអាមេរិកលោក ដូណាល់ ត្រាំ (Donald Trump) បានបញ្ជាឲ្យផ្អាករាល់ជំនួយយោធា ដល់អ៊ុយក្រែន ពីរបីថ្ងៃបន្ទាប់ពីការប៉ះទង្គិចពាក្យសម្តីមួយ លោក វ្ល៉ូឌីមី ហ្សេឡិនស្គី (Vladimir Zelensky) នៅសេតវិមាន កាលពីថ្ងៃទី ២៨ ខែកុម្ភៈ។ ការសម្រេចចិត្តរបស់មេដឹកនាំអាមេរិករូបនេះ បានចូលជាធរមាន នៅព្រឹកថ្ងៃទី ០៤ ខែមីនា។ ការផ្លាស់ប្តូរនេះ ទាក់ទងនឹងគ្រឿងយុទ្ធោបករណ៍អាមេរិកទាំងអស់ដែលមិនទាន់ទៅដល់អ៊ុយក្រែន រួមទាំងអាវុធដឹកជញ្ជូនតាមយន្តហោះ និងនាវា ឬរង់ចាំការដឹកជញ្ជូនពីតំបន់ឆ្លងកាត់ក្នុងប្រទេសប៉ូឡូញ។ ទីប្រឹក្សាសន្តិសុខជាតិរបស់ប្រធានាធិបតីអាមេរិក លោក Mike Waltz បាននិយាយកាលពីថ្ងៃទី ១១ ខែមីនាថា ទីក្រុងវ៉ាស៊ីនតោន នឹងបន្តការផ្គត់ផ្គង់ដល់ទីក្រុងគីវ តាមរយៈយន្តការសម្រាប់ជំនួយការពារជាតិជា      បន្ទាន់។

អាជ្ញាធររុស្ស៊ីបានសង្កត់ធ្ងន់ម្តងហើយម្តងទៀតថា ការផ្គត់ផ្គត់អាវុធដល់ទីក្រុងគីវ នឹងមិនរារាំងការសម្រេចចិត្តរបស់ទីក្រុងមូស្គូ ឬផ្លាស់ប្តូរទិសដៅនៃប្រតិបត្តិការយោធាពិសេសរបស់ខ្លួនបានឡើយ។