ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា ការសម្រេចចិត្តរបស់លោក Donald Trump ក្នុងការដាក់ពន្ធថ្មីលើទំនិញទាំងអស់ដែលនាំចូលទៅសហរដ្ឋអាមេរិក គឺជា «ការផ្ដល់ផលប៉ះពាល់យ៉ាងធ្ងន់ធ្ងរដល់សេដ្ឋកិច្ចពិភពលោក»។ 

ការអត្ថាធិប្បាយរបស់លោកស្រីបែបនេះ បានបន្ទរតាមការលើកឡើងពីប្រទេសមួយចំនួនទៀត ក្នុងនោះរួមមានទាំងប្រទេសចិនផងដែរ ដែលបានបង្ហាញការប្រឆាំងរបស់ខ្លួន ចំពោះចំណាត់ការនេះ ហើយបានព្រមានថា ខ្លួននឹងចាត់វិធានការឆ្លើយតបយ៉ាងម៉ឺងម៉ាត់ ចំពោះសហរដ្ឋអាមេរិក។

ពាក្យសម្ដីព្រមានរបស់មេដឹកនាំទាំងនោះ កើតឡើងបន្ទាប់ពីប្រធានាធិបតីអាមេរិក បានប្រកាសដំឡើងពន្ធ ១០ភាគរយជាសាកល លើការនាំចូលទាំងអស់ចូលសហរដ្ឋអាមេរិក ចាប់ពីថ្ងៃទី៥ ខែមេសាតទៅ។ ប្រទេសប្រហែល ៦០ ក៏នឹងទទួលរងផងដែរនូវវិធានការដំឡើងពន្ធនាំចូលដ៏តឹងរ៉ឹងនេះ ចាប់ពីថ្ងៃទី៩ ខែមេសា។ លោក Trump បានផ្ដល់ហេតុផលថា វិធានការនេះ គឺជាការតបតវិញ ចំពោះគោលនយោបាយពាណិជ្ជកម្មមិនយុត្តិធម៌។ 

នាព្រឹកថ្ងៃព្រហស្បតិ៍ (ទី៣ ខែមេសា) នេះ លោកស្រី Von der Leyen បាននិយាយថា ពន្ធថ្មីនេះ នឹងប្រឈមជាមួយ «ភាពមិនច្បាស់លាស់កាន់តែខ្លាំងឡើងៗ» ដែលបង្កឲ្យមានផលវិបាក «ធ្ងន់ធ្ងរ» ដល់មនុស្សរាប់លាននាក់នៅជុំវិញពិភពលោក។ លោកស្រីបានប្តេជ្ញាថា អឺរ៉ុបនឹងរួមគ្នាចាត់វិធានការ ហើយបានព្រមានថា សហភាពអឺរ៉ុបដែលនឹងត្រូវបានយកពន្ធ ២០ភាគរយ កំពុងរៀបចំវិធានការតបត ក្នុងករណីការចរចាបរាជ័យ។ 

នៅអឺរ៉ុបនេះដែរ នាយករដ្ឋមន្ត្រីអ៊ីតាលី លោកស្រី Giorgia Meloni ដែលជាសម្ព័ន្ធមិត្តរបស់លោក Trump បាននិយាយថា ការសម្រេចចិត្តនេះ គឺ «មិនត្រឹមត្រូវ» ទេ ខណៈសមភាគីអេស្ប៉ាញរបស់លោកស្រី គឺលោក Pedro Sánchez បាននិយាយថា អេស្ប៉ាញ នឹង «បន្តប្តេជ្ញាចិត្តចំពោះពិភពលោកដ៏បើកចំហមួយ»។ នាយករដ្ឋមន្ត្រីអៀរឡង់បានសម្ដែងការសោកស្ដាយយ៉ាងខ្លាំងចំពោះសម្រេចចិត្តរបស់លោក Trump ដោយប្រាប់ថា វាមិនផ្តល់ផលប្រយោជន៍ដល់ «នរណាម្នាក់» ឡើយ។ 

ខាងក្រៅអឺរ៉ុប បន្ទាប់ពីត្រូវបានដំឡើងពន្ធលើទំនិញនាំចូលដែលទាំងមុន និងក្រោយរហូតដល់យ៉ាងហោចណាស់ ៥៤ភាគរយ ក្រសួងពាណិជ្ជកម្មរបស់ប្រទេសចិន បានជំរុញឲ្យសហរដ្ឋអាមេរិក «លុបចោល» វិធានការនេះភ្លាមៗ ដោយបន្ថែមថា ប្រទេសចិននឹង «ចាត់វិធានការយ៉ាងម៉ឺងម៉ាត់ ដើម្បីការពារសិទ្ធិ និងផលប្រយោជន៍ផ្ទាល់ខ្លួន»។ ប្រធានាធិបតីស្ដីទីកូរ៉េខាងត្បូង លោក Han Duck-soo បាននិយាយថា សង្គ្រាមពាណិជ្ជកម្មសកល «បានក្លាយជាការពិតហើយ» បន្ទាប់ពីប្រទេសរបស់លោកត្រូវបង់ពន្ធកម្រិត ២៥ភាគរយ។ ប្រទេសជប៉ុន បានលើកឡើងថា ពន្ធ ២៤ភាគរយរបស់ខ្លួន គឺរឿង «គួរឲ្យសោកស្ដាយជាខ្លាំង» ហើយអាចបំពានលើច្បាប់របស់អង្គការពាណិជ្ជកម្មពិភពលោក និងកិច្ចព្រមព្រៀង រវាងសហរដ្ឋអាមេរិក និងជប៉ុន។

ជារួម ក្រោយការប្រកាសដំឡើងពន្ធរបស់លោក Trump បណ្ដាមេដឹកនាំនៃប្រទេសដែលរងផលប៉ះពាល់ដោយវិធានការនេះ សុទ្ធតែបានប្រតិកម្មតបថា ជារឿងមិនត្រឹមត្រូវ និងមិនយុត្តិធម៌ ខណៈប្រទេសទាំងនោះ នឹងចរចា មុននឹងសម្រេចចេញវិធានការតបតសងសឹកណាមួយ៕