បន្ទាប់ពីតុលាការធម្មនុញ្ញរបស់កូរ៉េខាងត្បូង នៅថ្ងៃសុក្រ (០៤ មេសា) សប្ដាហ៍នេះ បានសម្រេចដកលោកប្រធានាធិបតី Yoon Suk Yeol ចេញពីតំណែង ជុំវិញការប្រកាសច្បាប់អាជ្ញាសឹកដ៏គួរឱ្យភ្ញាក់ផ្អើលរបស់លោក ដែលបានបញ្ឆេះវិបត្តិនយោបាយដ៏អាក្រក់បំផុតក្នុងពេលជាច្រើនទសវត្សរ៍មក ពេលនេះពិភពលោកកំពុងរង់ចាំមើលរឿងរ៉ាវដែលនឹងកើតឡើងបន្ទាប់។

កូរ៉េខាងត្បូង នឹងត្រូវរៀបចំការបោះឆ្នោតប្រធានាធិបតីថ្មីក្នុងពេល ៦០ថ្ងៃ ហើយរហូតដល់ពេលនោះ លោកនាយករដ្ឋមន្ត្រី Han Duck-soo នឹងនៅតែជាប្រធានាធិបតីស្តីទី។ មេដឹកនាំថ្មីនឹងចូលកាន់តំណែងភ្លាមៗនៅពេលគណៈកម្មាធិការជាតិរៀបចំការបោះឆ្នោត ប្រកាសលទ្ធផល។

ការស្ទង់មតិបង្ហាញថា មេដឹកនាំបក្សប្រឆាំង លោក Lee Jae-myung ដែលបានចាញ់លោក Yoon ក្នុងសំឡេងយ៉ាងស្ដួចស្ដើងក្នុងការបោះឆ្នោតប្រធានាធិបតីឆ្នាំ២០២២ ពេលនេះកំពុងនាំមុខសម្រាប់ការបោះឆ្នោតបន្ទាប់ ដោយមិនមានគូប្រជែងធំៗនោះទេ។ មេដឹកនាំរូបណាក៏ដោយដែលឈ្នះការបោះឆ្នោត អាទិភាពចម្បងគឺការនាំមកនូវស្ថិរភាពដល់នយោបាយក្នុងស្រុក និងទទួលយកភារកិច្ចដ៏គួរឱ្យភ័យខ្លាចក្នុងការដោះស្រាយជាមួយអាមេរិក ព្រមទាំងភាពតានតឹងនៅលើឧបទ្វីបកូរ៉េ។

ការដកលោក Yoon ចេញពីតំណែង គឺជាចំណុចសំខាន់នៃភាពចលាចលជាច្រើនខែ ដែលមើលឃើញប្រជាជនកូរ៉េខាងត្បូង រាប់សែននាក់ចេញដើរតាមផ្លូវតវ៉ា ពីមួយសប្តាហ៍ទៅមួយសប្តាហ៍។ ភាពមិនច្បាស់លាស់នៅតែមាន ហើយគេនៅតែមិនច្បាស់ទេថា តើក្រុមអ្នកគាំទ្រលោក Yoon នឹងទទួលយកសេចក្តីសម្រេចរបស់តុលាការ ឬក៏បន្តតវ៉ាកាន់តែខ្លាំង៕