ក្រុម សម្ព័ន្ធសេរីភាពស៊ីវិលថ្មី ហៅកាត់ថា NCLA ដែលជាក្រុមអ្នកច្បាប់ខាងអភិរក្សនិយម កាលពីថ្ងៃព្រហស្បតិ៍ (០៣ មេសា) បានដាក់ពាក្យបណ្ដឹងលើអ្វីដែលខ្លួនបាននិយាយថា ជា "បណ្តឹងដំបូង" ដែលចង់រារាំងការដំឡើងពន្ធរបស់លោកប្រធានាធិបតីអាមេរិក Donald Trump លើការនាំចូលរបស់ចិន ដោយនិយាយថា មេដឹកនាំអាមេរិករូបនេះបានធ្វើហួសពីសិទ្ធិអំណាចរបស់ខ្លួន។

ពាក្យបណ្តឹង ដែលដាក់នៅតុលាការសហព័ន្ធក្នុងរដ្ឋ Florida បានចោទប្រកាន់ថា លោក Trump ពុំមានសិទ្ធិអំណាចផ្លូវច្បាប់គ្រប់គ្រាន់ក្នុងការដាក់ពន្ធបដិការ ដែលបានបើកបង្ហាញនៅថ្ងៃទី០២ ខែមេសា នោះទេ ក៏ដូចជាពន្ធកាតព្វកិច្ចផ្សេងទៀតដែលត្រូវបានអនុញ្ញាតកាលពីថ្ងៃទី០១ ខែកុម្ភៈ ក្រោមច្បាប់ស្តីពីអំណាចសេដ្ឋកិច្ចបន្ទាន់អន្តរជាតិ។

មេធាវីរបស់ក្រុម NCLA នេះបាននិយាយនៅក្នុងសេចក្តីថ្លែងការណ៍មួយថា "លោក Trump ប្រើអំណាចគ្រាអាសន្នដើម្បីដាក់ពន្ធលើទំនិញនាំចូលពីប្រទេសចិន ដែលលក្ខន្តិកៈមិនអនុញ្ញាត ហើយលោកបានប្រើអំណាចនោះដោយមិនត្រឹមត្រូវ និងរំលោភសិទ្ធិរបស់សភាក្នុងការគ្រប់គ្រងពន្ធ ព្រមទាំងធ្វើឱ្យខូចដល់ការបែងចែកអំណាចរបស់រដ្ឋធម្មនុញ្ញ"។

គួរឱ្យដឹងថា លោក Trump កាលពីថ្ងៃ០២ មេសា បានប្រកាសថា ចិននឹងរងការវាយប្រហារដោយពន្ធ ៣៤% បន្ថែមពីលើតួលេខ ២០% ដែលលោកបានដាក់រួចហើយកាលពីដើមឆ្នាំ២០២៥ ដោយនោះនាំឱ្យការយកពន្ធថ្មីសរុបលើចិន ឡើងដល់ ៥៤%។ បណ្តឹងនេះស្នើឱ្យចៅក្រមរារាំងការអនុវត្តពន្ធ និងលុបចោលជំហានរបស់លោក Trump ចំពោះកាលវិភាគដាក់ពន្ធរបស់អាមេរិក៕