បេសកជនរបស់អង្គការសហប្រជាជាតិ កាលពីថ្ងៃព្រហស្បតិ៍ បានថ្កោលទោសការវាយប្រហារតាមផ្លូវអាកាស និងថ្មើរជើងចុងក្រោយបង្អស់របស់អ៊ីស្រាអែល ទៅលើប្រទេសស៊ីរី ហើយបានចោទថា ទង្វើបែបនេះ ធ្វើឲ្យប៉ះពាល់ដល់កិច្ចខិតខំប្រឹងប្រែង ឆ្ពោះទៅរកសន្តិភាព និងធ្វើឲ្យប្រទេសនេះអស្ថិរភាព។

នៅក្នុងសេចក្តីថ្លែងការណ៍មួយ លោក Geir Pedersen បេសកជនពិសេសរបស់អង្គការសហប្រជាជាតិទទួលបន្ទុកប្រទេសស៊ីរី បានថ្កោលទោសការបង្កើនភាពតានតឹងយោធាម្តងហើយម្តងទៀតដោយអ៊ីស្រាអែល នៅក្នុងប្រទេសស៊ីរី រួមទាំងការវាយប្រហារតាមអាកាសដែលបានរាយការណ៍ថា បានបណ្តាលឲ្យ ជនស៊ីវិលជាច្រើនស្លាប់ និងរងរបួស។

លោកបាននិយាយថា៖«សកម្មភាពបែបនេះ បំផ្លាញកិច្ចខិតខំប្រឹងប្រែង ដើម្បីកសាងប្រទេសស៊ីរីថ្មីប្រកបដោយសន្តិភាព ដោយខ្លួនឯងផ្ទាល់ និងតំបន់ និងធ្វើឲ្យស៊ីរីអស្ថិរភាព នៅពេលវេលាដ៏សំខាន់នេះ»។

បេសកជនពិសេសរូបនេះ បានអំពាវនាវឲ្យអ៊ីស្រាអែលបញ្ឈប់ការវាយប្រហារទាំងនេះ ដែលអាចឈានដល់ការរំលោភច្បាប់អន្តរជាតិយ៉ាងធ្ងន់ធ្ងរ និងគោរពអធិបតេយ្យភាពរបស់ប្រទេសស៊ីរី និងកិច្ចព្រមព្រៀងដែលមានស្រាប់ ព្រមទាំងបញ្ឈប់សកម្មភាពឯកតោភាគី នៅលើទឹកដីនេះផងដែរ។

លោកជំរុញឲ្យភាគីទាំងអស់ផ្តល់អាទិភាពដល់ដំណោះស្រាយការទូត និងការសន្ទនា ដើម្បីដោះស្រាយបញ្ហាសន្តិសុខ និងទប់ស្កាត់មិនឲ្យមានការកើនឡើងភាពតានតឹងបន្ថែមទៀត។

យោធាអ៊ីស្រាអែល បានបើកការវាយប្រហារតាមអាកាសចំនួន ២៥លើក ដោយកំណត់គោលដៅទៅ លើទីតាំងយោធានៅទូទាំងប្រទេសស៊ីរី កាលពីល្ងាចថ្ងៃពុធ ដែលតាមសេចក្តីរាយការណ៍ បានសម្លាប់សមាជិកអាជ្ញាធរការពារប្រទេសស៊ីរីយ៉ាងតិច ៤នាក់ និង ១២នាក់ផ្សេងទៀត រងរបួស។