រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃព្រហស្បតិ៍ (ទី៣ ខែមេសា) បានធានាឡើងវិញ ចំពោះសមភាគីដាណឺម៉ាករបស់លោក អំពីទំនាក់ទំនង «ដ៏រឹងមាំ» រវាងប្រទេសទាំង២ នៅពេលដែលភាពតានតឹងកើនឡើង ជុំវិញការគំរាមកំហែងរបស់ទីក្រុងវ៉ាស៊ីនតោន ចំពោះដែនដី Greenland។

បន្ទាប់ពីមានជំនួបនៅក្រៅកិច្ចប្រជុំរបស់អង្គការណាតូ នៅទីក្រុងប្រ៊ុចសែល ប្រទេសបែលហ្ស៊ិក សេចក្តីថ្លែងការណ៍របស់សហរដ្ឋអាមេរិក បានលើកឡើងថា៖«លោករដ្ឋមន្ត្រី Rubio បានបញ្ជាក់ឡើងវិញនូវទំនាក់ទំនងដ៏គួរឲ្យទុកចិត្តបាន រវាងសហរដ្ឋអាមេរិក និងប្រទេសដាណឺម៉ាក»។ តែសេចក្តីថ្លែងការណ៍នោះ មិនបានបញ្ជាក់នោះឡើយថា តើមានការពិភាក្សា ជុំវិញដែនដីស្វយ័ត Greenland របស់ដាណឺម៉ាកដែរ ឬអត់។

គួរបញ្ជាក់ថា ភាពតានតឹង រវាងសហរដ្ឋអាមេរិក និងដាណឺម៉ាក បានកើនឡើង បន្ទាប់ពីប្រធានាធិបតីលោក Donald Trump បាននិយាយម្តងហើយម្តងទៀតថា លោកចង់គ្រប់គ្រងកោះអាក់ទិកដែលសម្បូរធនធានមួយនេះ ដោយសារហេតុផលសន្តិសុខ។

យ៉ាងណាក្ដី សេចក្តីថ្លែងការណ៍របស់សហរដ្ឋអាមេរិក បានឲ្យដឹងបន្ថែមថា កិច្ចពិភាក្សារបស់លោក Rubio ជាមួយរដ្ឋមន្ត្រីការបរទេសដាណឺម៉ាក លោក Lars Lokke Rasmussen បានផ្តោតលើ «អាទិភាពរួម ដែលរួមមានការបង្កើនការចំណាយផ្នែកការពារជាតិ សម្រាប់អង្គការណាតូ ព្រមទាំងចែករំលែកបន្ទុក និងដោះស្រាយការគំរាមកំហែង ចំពោះសម្ព័ន្ធមិត្ត ក្នុងនោះរួមទាំងការគំរាមកំហែងដែលបង្កឡើងដោយរុស្ស៊ី និងចិនផងដែរ»។

ជាមួយគ្នានេះ សេចក្តីថ្លែងការណ៍ បានសង្កត់ធ្ងន់ថា៖ «ពួកគេក៏បានពិនិត្យមើលការសម្របសម្រួលដែលកំពុងបន្តមាន ដើម្បីបង្កើនស្ថិរភាព និងសន្តិសុខ នៅក្នុងទ្វីបអឺរ៉ុប និងដើម្បីធានាឲ្យបាននូវសន្តិភាពយូរអង្វែង នៅក្នុងប្រទេសអ៊ុយក្រែន»៕