រដ្ឋមន្ត្រីការបរទេសទួរគី លោក Hakan Fidan នៅថ្ងៃសុក្រ (ទី៤ ខែមេសា) នេះ បានប្រាប់សារព័ត៌មាន Reuters ថា ប្រទេសទួរគីមិនចង់ប្រឈមមុខជាមួយអ៊ីស្រាអែលនៅក្នុងប្រទេសស៊ីរីនោះទេ បន្ទាប់ពីការវាយប្រហាររបស់អ៊ីស្រាអែលម្តងហើយម្តងទៀតលើទីតាំងយោធា នៅទីនោះ បានធ្វើឲ្យខូចដល់លទ្ធភាពរបស់រដ្ឋាភិបាលថ្មី ក្នុងការទប់ស្កាត់ការគំរាមកំហែងនានា។

នៅក្នុងបទសម្ភាសន៍មួយនៅខាងក្រៅកិច្ចប្រជុំរបស់រដ្ឋមន្ត្រីការបរទេសរបស់អង្គការណាតូ (NATO) នៅទីក្រុងប្រ៊ុចសែល ប្រទេសបែលហ្ស៊ិក លោក Fidan បាននិយាយថា សកម្មភាពរបស់អ៊ីស្រាអែល នៅស៊ីរី ដែលរដ្ឋបាលរបស់ប្រធានាធិបតី លោក Ahmed al-Sharaa គឺជាសម្ព័ន្ធមិត្តដ៏ជិតស្និទ្ធរបស់ទួរគីនោះ កំពុងបើកផ្លូវឲ្យមានអស្ថិរភាព ក្នុងតំបន់នាពេលអនាគត។

លោកបានបន្ថែមថា ប្រសិនបើរដ្ឋបាលថ្មី នៅក្នុងទីក្រុងដាម៉ាស ចង់មាន «កិច្ចព្រមព្រៀងណាមួយ» ជាមួយអ៊ីស្រាអែល ដូចមានជាមួយទួរគី ដែលអ្នកជិតខាងរបស់ស៊ីរី នោះគឺជាកិច្ចការរបស់ពួកគេផ្ទាល់។

ទួរគី ដែលជាប្រទេសសមាជិកអង្គការណាតូ បានរិះគន់អ៊ីស្រាអែលយ់ាងខ្លាំងក្លា ចំពោះការវាយប្រហារលើតំបន់ហ្កាហ្សា ចាប់តាំងពីឆ្នាំ២០២៣ ដោយលើកឡើងថា ការវាយប្រហារទាំងនោះ ស្មើនឹងការប្រព្រឹត្តិអំពើប្រល័យពូជសាសន៍ ចំពោះប្រជាជនប៉ាឡេស្ទីន ហើយបានដាក់ពាក្យចូលរួមប្ដឹងទៅតុលាការពិភពលោកប្រឆាំងនឹងអ៊ីស្រាអែល ស្របពេលបញ្ឈប់ការធ្វើពាណិជ្ជកម្មទាំងអស់។ អ៊ីស្រាអែលបដិសេធការចោទប្រកាន់ពីបទប្រល័យពូជសាសន៍នោះ។

ជម្លោះ រវាងមហាអំណាច ក្នុងតំបន់ បានរាលដាលចូលទៅក្នុងប្រទេសស៊ីរី ដោយកងកម្លាំងអ៊ីស្រាអែលបានវាយប្រហារស៊ីរីជាច្រើនសប្តាហ៍ ចាប់តាំងពីរដ្ឋបាលថ្មី បានកាន់កាប់ទីក្រុងដាម៉ាស។ ទួរគីបានហៅការវាយប្រហាររបស់អ៊ីស្រាអែលថា ជារំលោភទន្ទ្រានដែនដីស៊ីរី ខណៈដែលអ៊ីស្រាអែល បាននិយាយថា ខ្លួននឹងមិនអនុញ្ញាតឲ្យមានកងកម្លាំងអរិភាពណាមួយ នៅក្នុងប្រទេសស៊ីរីឡើយ៕