សារព័ត៌មានយ៉ុនហាប់ (Yonhap) បានរាយការណ៍នៅថ្ងៃចន្ទ (០៧ មេសា) នេះថា គណៈរដ្ឋមន្ត្រីរបស់ប្រទេសកូរ៉េខាងត្បូង ត្រូវបានគេរំពឹងថានឹងសម្រេចកាលបរិច្ឆេទនៅថ្ងៃទី០៣ ខែមិថុនា សម្រាប់ការបោះឆ្នោតប្រធានាធិបតីថ្មី បន្ទាប់ពីការដកតំណែងលោក Yoon Suk Yeol កាលពីសប្តាហ៍មុន ដោយសារតែការប្រកាសច្បាប់អាជ្ញាសឹករយៈពេលខ្លីរបស់លោក។

សារព័ត៌មាន Yonhap បានដកស្រង់សម្តីមន្ត្រីរដ្ឋាភិបាលមួយរូបថា បើទោះជាមិនត្រូវបានតម្រូវដោយច្បាប់ក៏ដោយ គណៈរដ្ឋមន្ត្រីនឹងធ្វើការសម្រេចចិត្តនៅក្នុងកិច្ចប្រជុំមួយនៅថ្ងៃអង្គារ (០៨ មេសា) ស្អែកនេះ ដោយសារខ្លួនត្រូវការអនុម័តថ្ងៃឈប់សម្រាកសម្រាប់ព្រឹត្តិការណ៍បោះឆ្នោតនោះ។

គួរឱ្យដឹងថា លោក Yoon ត្រូវបានតុលាការធម្មនុញ្ញដកចេញពីតំណែងប្រធានាធិបតីរបស់ខ្លួន ដោយហេតុផលថាលោកបានរំលោភលើកាតព្វកិច្ចផ្លូវការ ជុំវិញការចេញក្រឹត្យច្បាប់អាជ្ញាសឹកកាលពីថ្ងៃទី០៣ ខែធ្នូ និងការចល័តកងទ័ពដើម្បីបញ្ឈប់ដំណើរការសភា។

ច្បាប់កូរ៉េខាងត្បូង តម្រូវឱ្យមានការបោះឆ្នោតប្រធានាធិបតីថ្មីក្នុងពេល ៦០ថ្ងៃ ប្រសិនបើមេដឹកនាំកំពុងកាន់អំណាចទទួលមរណៈភាព ឬត្រូវគេដកចេញពីតំណែង។ មន្ត្រីនៃគណៈកម្មាធិការជាតិរៀបចំការបោះឆ្នោតរូបនោះបាននិយាយថា កាលបរិច្ឆេទដែលបានលើកឡើងនៅក្នុងរបាយការណ៍ប្រព័ន្ធផ្សព្វផ្សាយនេះមិនមែនជាកាលបរិច្ឆេទចុងក្រោយទេ ហើយនឹងមិនផ្លូវការឡើយ រហូតដល់មានការប្រកាសដោយប្រធានាធិបតីស្តីទី គឺលោកនាយករដ្ឋមន្ត្រី Han Duck-soo៕