ប្រធានាធិបតីអាមេរិក លោក Donald Trump កាលពីថ្ងៃអាទិត្យ (០៦ មេសា) បាននិយាយថា រដ្ឋាភិបាលបរទេសនឹងត្រូវចំណាយ "ប្រាក់ច្រើន" ដើម្បីដកការដំឡើងពន្ធបដិការ ដែលលោកបានហៅថាជា "ឱសថ" ខណៈទីផ្សារហិរញ្ញវត្ថុ ដែលរងភាពរង្គោះរង្គើរួចទៅហើយ បានចង្អុលបង្ហាញទៅរកការខាតបង់ដ៏ធំធេងមួយសប្តាហ៍ទៀត។

ថ្លែងទៅកាន់អ្នកសារព័ត៌មាននៅលើយន្តហោះ Air Force One លោក Trump បានលើកឡើងថា លោកមិនព្រួយបារម្ភអំពីការខាតបង់ទីផ្សារ ដែលបានបាត់បង់តម្លៃជិត ៦សែនកោដិ៍ដុល្លារពីភាគហ៊ុនរបស់សហរដ្ឋអាមេរិកនោះទេ។ លោកបាននិយាយថា "យើងមិនចង់ឱ្យមានអ្វីធ្លាក់ចុះទេ ប៉ុន្តែពេលខ្លះ អ្នកត្រូវលេបថ្នាំដើម្បីព្យាបាលអ្វីមួយ"។

លើសពីការវាយប្រហារភាគហ៊ុន ការប្រកាសពន្ធរបស់លោក Trump កាលពីសប្តាហ៍មុន បានធ្វើឱ្យសេដ្ឋកិច្ចជុំវិញពិភពលោករង្គោះរង្គើ ដោយបង្កឱ្យមានការសងសឹកពីប្រទេសចិន និងបង្កឱ្យមានការភ័យខ្លាចនៃសង្គ្រាមពាណិជ្ជកម្មពិភពលោក និងការធ្លាក់ចុះសេដ្ឋកិច្ចកាន់តែខ្លាំង។

ភ្នាក់ងារគយរបស់សហរដ្ឋអាមេរិក បានចាប់ផ្តើមប្រមូលពន្ធឯកតោភាគី ១០% របស់លោក Trump លើការនាំចូលទាំងអស់ពីប្រទេសជាច្រើនកាលពីថ្ងៃសៅរ៍ ០៥ មេស រួចទៅហើយ។ អត្រាពន្ធ "បដិការ" ខ្ពស់ជាងនេះ ចាប់ពី ១១% ទៅ ៥០% លើប្រទេសនីមួយៗ នឹងត្រូវចូលជាធរមាននៅម៉ោង ១២:០១រំលងអាធ្រាត្រ (ម៉ោងក្នុងស្រុក) ឈានចូលថ្ងៃពុធ ០៩ មេសា ខាងមុខនេះ៕