អ៊ីរ៉ង់៖ ​អ្នកការទូត​ជាន់ខ្ពស់​របស់​អ៊ីរ៉ង់​និយាយ​ថា កិច្ចព្រមព្រៀង​ដើម្បី​ស្តារ​ឡើង​វិញ​នូវ​កិច្ចព្រមព្រៀង​នុយក្លេអ៊ែរ​របស់​ប្រទេស​ខ្លួន ​ជាមួយមហាអំណាច​ពិភពលោក​គឺនឹង​ឈាន​ដល់​គោលដៅ ប៉ុន្តែ​ថា នេះ​អាស្រ័យ​លើ​សុច្ឆន្ទៈ​របស់​លោក​ខាងលិច​។​ ​រដ្ឋមន្ត្រីការបរទេស​លោក Hossein Amir-Abdollahian បាន​និយាយ​នៅ​លើ​បណ្ដាញ​សង្គម Twitter កាលពី​ថ្ងៃ​ព្រហស្បតិ៍​ថា ការចរចា​នៅ​ក្នុង​រដ្ឋធានី​វី​យែ​ន​របស់​ប្រទេស​អូទ្រីសកំពុង​ដំណើរការ​ដោយ​ភាព​ធ្ងន់ធ្ងរ ហើយ​ថា​ការ​ដក​ទណ្ឌកម្ម​គឺជា​អាទិ​ភាពជា​មូលដ្ឋាន។​

លោក Amir-Abdollahian ​បាន​និយាយ​ថា “​កិច្ចព្រមព្រៀង​ល្អ​អាច​ទៅដល់​បាន ប្រសិនបើ​ប្រទេស​លោក​ខាង​លិច​បង្ហាញ​ឆន្ទៈ​ស្មោះត្រង់​។ យើង​ស្វែងរក​ការសន្ទនា​ដែល​មាន​ភាព​សមស្រប មាន​សុទិដ្ឋិនិយម និង​មាន​លទ្ធផល​។​ ​កិច្ចចរចា​មាន​គោលបំណង​ស្តារ​ឡើង​វិញ​នូវ​កិច្ចព្រមព្រៀង​នុយក្លេអ៊ែរ​ឆ្នាំ២០១៥ រវាង​អ៊ីរ៉ង់ និង​មហា​អំណាច​ពិភពលោក​មួយ​ចំនួន​ដូចជាអង់គ្លេស ចិន បារាំង អាល្លឺម៉ង់ រុស្ស៊ី និង​សហរដ្ឋ​អាមេរិក បាន​បន្ត​កាលពី​ថ្ងៃ​ចន្ទបន្ទាប់ពី​អ៊ីរ៉ង់​បាន​ផ្អាក​កាលពី​ខែ​មិថុនា បន្ទាប់ពី​ការបោះឆ្នោត​របស់​ប្រធានាធិបតី​ប្រកាន់​តឹង​លោក Ebrahim Raisi។​ សហរដ្ឋអាមេរិក​ដែល​បាន​ដក​ខ្លួន​ជា​ឯកតោភាគី​ចេញពី​កិច្ចព្រមព្រៀង​ក្នុង​ឆ្នាំ២០១៨ កំពុង​ចូលរួម​ក្នុង​ការ​ចរចា​នេះ​ដោយ​ប្រយោល ​ដោយសារតែ​ការ​ទទូច​មិន​ឲ្យ​មានការ​ចូលរួម​ដោយ​ផ្ទាល់​ពី​អ៊ីរ៉ង់​៕

អត្ថបទ៖ សុខមាន