សារព័ត៌មានរ៉យទ័រ បានរាយការណ៍កាលពីថ្ងៃអាទិត្យ (០៦ មេសា) ដោយដកស្រង់សម្តីមន្ត្រីដែលដឹងពីបញ្ហានេះថា អ៊ីរ៉ង់ បានដាក់កម្លាំងយោធារបស់ខ្លួនឱ្យស្ថិតនៅក្នុងការប្រុងប្រយ័ត្នខ្ពស់បំផុត និងបានព្រមានប្រទេសជិតខាងដែលមានមូលដ្ឋានទ័ពអាមេរិក កុំឱ្យគាំទ្រការវាយប្រហាររបស់ទីក្រុងវ៉ាស៊ីនតោន ដែលអាចកើតមាន បន្ទាប់ពីលោកប្រធានាធិបតីអាមេរិក Donald Trump បានគំរាមវាយប្រហារទីក្រុងតេអេរ៉ង់ ជុំវិញភាពតានតឹងកម្មវិធីនុយក្លេអ៊ែរ។

វិធានការការពារដែលបានរាយការណ៍នេះ ធ្វើឡើងបន្ទាប់ពីលិខិតរបស់លោក Trump ទៅកាន់មេដឹកនាំកំពូលអ៊ីរ៉ង់ លោក Ayatollah Ali Khamenei ដែលជំរុញឱ្យមានការចរចាដោយផ្ទាល់ក្នុងបំណងបញ្ឈប់កម្មវិធីនុយក្លេអ៊ែររបស់អ៊ីរ៉ង់ ហើយលោក Trump ក៏បានគំរាមយុទ្ធនាការយោធា និងពន្ធ ប្រសិនបើកិច្ចព្រមព្រៀងថ្មីមិនត្រូវបានសម្រេច។ អ៊ីរ៉ង់ នៅតែបន្តបដិសេធថាមិនចរចាដោយផ្ទាល់ទេ ប៉ុន្តែបើកចំហចំពោះកិច្ចពិភាក្សាដោយប្រយោលជាមួយទីក្រុងវ៉ាស៊ីនតោន។

ប្រភពពីមន្រ្តីអ៊ីរ៉ង់និយាយថា ទីក្រុងតេអេរ៉ង់ "បានចេញសេចក្ដីជូនដំណឹងទៅកាន់អ៊ីរ៉ាក់ គុយវ៉ែត អារ៉ាប់រួម កាតា ទួរគី និងបារ៉ែន" ដោយព្រមានថា ការអនុញ្ញាតឱ្យកងកម្លាំងអាមេរិក ប្រើប្រាស់ដែនអាកាស ឬក៏ទឹកដីរបស់ពួកគេក្នុងការវាយប្រហារណាមួយ នឹងត្រូវចាត់ទុកថាជាសកម្មភាពអរិភាព ហើយនឹងរងផលវិបាកតបវិញយ៉ាងធ្ងន់ធ្ងរ។

ប្រភពបញ្ជាក់ថា មេដឹកនាំកំពូល លោក Khamenei បានបញ្ជាឱ្យកងកម្លាំងប្រដាប់អាវុធរបស់អ៊ីរ៉ង់ មានការប្រុងប្រយ័ត្នខ្ពស់។ លោក Hossein Salami មេបញ្ជាការកងឆ្មាំបដិវត្តន៍អ៊ីស្លាម (IRGC) បានព្រមានកាលពីថ្ងៃសៅរ៍ចុងសប្ដាហ៍ថា អ៊ីរ៉ង់ "ត្រៀមខ្លួនរួចជាស្រេចសម្រាប់សង្គ្រាមណាមួយ"៕