កាលពីថ្ងៃអាទិត្យម្សិលមិញ កូរ៉េខាងជើង បានរៀបចំព្រឹត្តការណ៍រត់ម៉ារ៉ាតុងអន្តរជាតិក្រុងព្យុងយ៉ាងជាលើកដំបូង ចាប់តាំងពីការរីករាលដាលឆ្លងសកលជំងឺ COVID-19 ។

យោងតាមការចុះផ្សាយរបស់ទីភ្នាក់ងារព័ត៌មានជាតិកូរ៉េខាងជើង KCNA បានឲ្យដឹងថា ក្រុមអត្តពលិកមកពីប្រទេសចិន រ៉ូម៉ានី និងប្រទេសដទៃជាច្រើនទៀត បានចូលរួមព្រឹត្តការណ៍មួយនេះ ។

គួរឲ្យដឹងថា រដ្ឋឯកាមួយនេះ បានបិទព្រំដែនរបស់ខ្លួនកាលពីឆ្នាំ ២០២០ ពេលចាប់ផ្តើមការរីករាលដាលឆ្លងសកលជំងឺ COVID-19 ប៉ុន្តែពួកគេបានដកចេញការរឹតត្បិតព្រំដែនបន្តិចម្តងៗ ចាប់តាំងពីឆ្នាំ ២០២៣រហូតមក ។

រូបភាពវីដេអូឃ្លីបផ្តល់ជូនដោយ KCNA ឃើញក្រុមកីឡាកររត់ប្រណាំងម៉ារ៉ាតុង ត្រូវបានអបអរសាទរដោយពលដ្ឋកូរ៉េខាងជើង ពេលដែលពួកគេចូលក្នុងពហុកីឡដ្ឋាន ។ 

ទោះបីជាយ៉ាងណាក៏ដោយ ទីភ្នាក់ងារព័ត៌មានរ៉យទ័រ ពុំអាចបញ្ជាក់ផ្ទៀងផ្ទាត់ដោយឯករាជ្យបានឡើយចំពោះរូបភាពវីដេអូឃ្លីបមួយនេះ ។

អគ្គនាយកក្រុមហ៊ុន Koryo Tours ដែលមានមូលដ្ឋាននៅទីក្រុងប៉េកាំង ប្រទេសចិន បាននិយាយនៅក្នុងសារបង្ហោះលើបណ្តាញព័ត៌មានសង្គម Instagramថា ជនប្រទេសប្រហែល ២០០នាក់ បានមកដល់ទីក្រុងព្យុងយ៉ាង កាលពីថ្ងៃសុក្រ និងថ្ងៃសៅរ៍ សម្រាប់ការរត់ប្រណាំងមួយនេះ ។

យោងតាមការអះអាងរបស់ក្រុមហ៊ុន បានឲ្យដឹងថា ការរត់ប្រណាំងម៉ារ៉ាតុងនេះ បានឆ្លងកាត់តំបន់ភាគកណ្តាលទីក្រុងព្យុងយ៉ាង ឆ្លងកាត់តំបន់ប្រវត្តិសាស្រ្ត ឆ្ពោះទៅកាន់តំបន់ជនបទ មុនពេលបញ្ចប់នៅក្នុងពហុកីឡដ្ឋានដែលមានទស្សនកិច្ចជន ៥ម៉ឺននាក់ ៕