កូដកម្មដ៏ទូលំទូលាយមួយបានកើតឡើងនៅទូទាំងតំបន់កាន់កាប់ West Bank និងទីតាំងនានាជាច្រើនទៀត កាលពីថ្ងៃចន្ទ (០៧ មេសា) ប្រឆាំងនឹងការវាយលុករបស់អ៊ីស្រាអែល លើដែនដីហ្កាហ្សា។ ហាងទំនិញ ផ្សារ សាលារៀន សាកលវិទ្យាល័យ ធនាគារ និងការិយាល័យសាធារណៈត្រូវបានបិទ ហើយខ្សែដឹកជញ្ជូនត្រូវផ្អាក ដោយសារតែកូដកម្មដែលអំពាវនាវដោយបក្សពួកប៉ាឡេស្ទីន។

នៅទីក្រុង Ramallah ភាគកណ្តាលទឹកដី West Bank មើលឃើញ ប្រជាជនប៉ាឡេស្ទីនរាប់រយនាក់ដើរតាមផ្លូវដើម្បីរិះគន់ "ឧក្រិដ្ឋកម្ម" របស់អ៊ីស្រាអែលនៅហ្កាហ្សា ដោយគ្រវីទង់ជាតិប៉ាឡេស្ទីន និងស្រែកពាក្យតវ៉ាទាមទារឱ្យបញ្ចប់ការវាយលុករបស់អ៊ីស្រាអែល ខណៈពួកគេដើរកាត់កណ្តាលក្រុង។

បាតុកម្មប្រឆាំងនឹងអ៊ីស្រាអែលបែបនេះក៏ត្រូវបានធ្វើឡើងនៅខាងក្រៅតំបន់ West Bank ផងដែរ ដោយទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានឱ្យដឹងថា ការតវ៉ានេះត្រូវបានរៀបចំឡើងនៅក្នុងប្រទេសទុយនីស៊ី ហ្ស៊កដានី ស៊ីរី លីបង់ បង់ក្លាដែស និងទីក្រុងហ្សេរុយសាឡិម ដែលមើលឃើញមានអ្នកចូលរួមរាប់ពាន់នាក់។

អ៊ីស្រាអែល បានបន្តវាយប្រហារលើហ្កាហ្សា នៅថ្ងៃទី ១៨ ខែមីនា ដោយបានបំបែកបទឈប់បាញ់ ដែលបានចូលជាធរមានក្នុងខែមករា។ កាលពីសប្តាហ៍មុន នាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាថានឹងបង្កើនការវាយប្រហារលើដែនដីហ៊ុមព័ទ្ធនេះបន្ថែមទៀត ស្របពេលមានកិច្ចប្រឹងប្រែងដើម្បីអនុវត្តផែនការរបស់លោកប្រធានាធិបតីអាមេរិក Donald Trump ដើម្បីជម្លៀសប្រជាជនប៉ាឡេស្ទីនចេញពីតំបន់នោះ៕