ប្រទេសជប៉ុនទំនងជាទទួលបានអាទិភាពជាងដៃគូពាណិជ្ជកម្មរបស់សហរដ្ឋអាមេរិកផ្សេងទៀត សម្រាប់កិច្ចពិភាក្សា ស្តីពីបញ្ហាដំឡើងពន្ធ ដោយធ្វើឲ្យទីក្រុងតូក្យូឡើងទៅឈរពីមុខគេ នៅក្នុងជួរដ៏វែងរបស់ប្រទេសនានាដែលស្វែងរកការលុបចោលកាតព្វកិច្ចពន្ធរបស់ប្រធានាធិបតីអាមេរិកលោក Donald Trump ដែលគ្រោងចាប់ផ្តើមនៅថ្ងៃទី៩ ខែមេសា។

រដ្ឋមន្ត្រីក្រសួងរតនាគារ លោក Scott Bessent ដែលរួមជាមួយតំណាងពាណិជ្ជកម្មអាមេរិក លោក Jamieson Greer នឹងដឹកនាំភាគីអាមេរិក សម្រាប់ការចរចានេះ បាននិយាយថា៖ «ខ្ញុំរំពឹងថា ប្រទេសជប៉ុននឹងទទួលបានអាទិភាពមុនគេ ក្នុងចំណោមដៃគូពាណិជ្ជកម្ម ដោយសារការវិវត្តទៅមុខយ៉ាងឆាប់រហ័ស»។

ការជំរុញឲ្យមានកិច្ចចរចាពាណិជ្ជកម្មទ្វេភាគីនេះ កើតឡើងនៅពេលដែលនាយករដ្ឋមន្ត្រីជប៉ុន លោក Shigeru Ishiba បានកោះប្រជុំគណៈរដ្ឋមន្ត្រី នៅព្រឹកថ្ងៃទី៨ ខែមេសា ដើម្បីពិភាក្សាអំពីបញ្ហាពន្ធគយនេះ។

នៅមុនកិច្ចប្រជុំនោះ លោក Ishiba បានរំលឹកឡើងវិញថា តើការដំឡើងពន្ធរបស់អាមេរិក គឺជារឿងគួរឲ្យសោកស្ដាយកម្រិតណា ហើយបានបង្ហាញពីក្ដីបារម្ភរបស់លោក ចំពោះផលប៉ះពាល់ដែលវិធានការនេះ នឹងមានលើឧស្សាហកម្មរថយន្តដ៏ធំរបស់ប្រទេសជប៉ុន។

កិច្ចប្រជុំនេះ បានធ្វើឡើងបន្ទាប់ពីមានការជជែកគ្នាតាមទូរសព្ទ រវាងលោក Trump និងលោក Ishiba កាលពីថ្ងៃទី៧ ខែមេសា ដែលលោកនាយករដ្ឋមន្ត្រីជប៉ុន បាននិយាយថា វិធានការពន្ធ នឹងកាត់បន្ថយសមត្ថភាពរបស់ក្រុមហ៊ុនជប៉ុន ក្នុងការវិនិយោគ នៅសហរដ្ឋអាមេរិក។ លោក Trump បានប្តេជ្ញាថា ពន្ធរបស់លោក នឹងជំរុញឲ្យក្រុមហ៊ុនផ្លាស់ផលិតកម្មទៅអាមេរិក។

លោក Trump បានដាក់កម្រិតពន្ធលើជប៉ុន ២៤ភាគរយ សម្រាប់ពន្ធបដិការលើគ្រប់មុខទំនិញទាំងអស់ និងយកពន្ធលើរថយន្ត ២៥ភាគរយ៕