បន្ទាប់ពីសហរដ្ឋអាមេរិក បានប្រកាសកាលពីថ្ងៃអង្គារ (០៨ មេសា) ថាពន្ធ ១០៤% លើការនាំចូលពីចិន នឹងចូលជាធរមានបន្ទាប់ពីពាក់កណ្តាលអធ្រាត្រឈានចូលថ្ងៃពុធ (០៩ មេសា) នេះ ភាគហ៊ុនពិភពលោក ដែលបានរង្គោះរង្គោះខ្លាំងរួចទៅហើយ ពេលនេះបានបន្តធ្លាក់ចុះម្ដងទៀត ទោះបីជារដ្ឋបាលរបស់លោកប្រធានាធិបតី Donald Trump ថានឹងចាប់ផ្តើមការពិភាក្សាយ៉ាងឆាប់រហ័សជាមួយដៃគូពាណិជ្ជកម្មផ្សេងទៀត ដែលរងពន្ធបដិការដ៏ទូលំទូលាយនោះក៏ដោយ។

ភាគហ៊ុនរបស់អាមេរិក បានធ្លាក់ចុះខ្លាំងនៅថ្ងៃអង្គារ សម្រាប់ការជួញដូរ ៤ថ្ងៃជាប់គ្នា ចាប់តាំងពីការប្រកាសពន្ធរបស់លោក Trump កាលពីសប្តាហ៍មុន ដោយភាគហ៊ុន S&P 500 បានបិទក្រោម ៥.០០០ពិន្ទុ ជាលើកដំបូងក្នុងពេលជិតមួយឆ្នាំ ហើយសន្ទស្សន៍របស់ខ្លួនឥឡូវនេះគឺ ១៨,៩% នៅក្រោមកម្រិតខ្ពស់បំផុតកាលថ្ងៃទី១៩ ខែកុម្ភៈ។

បណ្ដាក្រុមហ៊ុនក្នុងសម្ព័ន្ធ S&P 500 បានបាត់បង់តម្លៃទីផ្សារភាគហ៊ុនចំនួន ៥,៨សែនកោដិ៍ដុល្លារ ចាប់តាំងពីការប្រកាសពន្ធរបស់លោក Trump កាលពីថ្ងៃពុធសប្តាហ៍មុនមក ដែលជាការខាតបង់យ៉ាងជ្រៅបំផុតក្នុងពេល ៤ថ្ងៃ ចាប់តាំងពីសន្ទស្សន៍ហ៊ុនត្រូវបានបង្កើតឡើងក្នុងទសវត្សរ៍ឆ្នាំ១៩៥០ នេះបើយោងតាមទិន្នន័យរបស់ LSEG ។

នៅអាស៊ីវិញ ហ៊ុន Nikkei របស់ជប៉ុន បានមើលឃើញការលក់ចេញយ៉ាងទូលំទូលាយនៅព្រឹកថ្ងៃពុធ ០៩ មេសា ហើយទីផ្សារអាស៊ីផ្សេងទៀតក៏ត្រៀមរងការធ្លាក់ចុះដូចគ្នានេះ ជាច្រើនម៉ោងមុនពេលពន្ធចូលជាធរមាន។ ទីផ្សារពិភពលោកពីមុនបានកើនឡើងបន្តិចក្នុងក្តីសង្ឃឹមថា លោក Trump អាចមានឆន្ទៈក្នុងការចរចារលើរបាំងពាណិជ្ជកម្ម និងផលិតផលជាក់លាក់មួយចំនួនក្នុងទីផ្សារអ្នកប្រើប្រាស់ធំបំផុតរបស់ពិភពលោកមួយនេះ ប៉ុន្តែពេលនេះភាពមិនច្បាស់បានបន្តកើតឡើងជាថ្មី៕