ខណៈដែលមានការអំពាវនាវកាន់តែខ្លាំងឱ្យក្រុមហេសបូឡា របស់ប្រទេសលីបង់ រំសាយអាវុធ ពេលនេះមន្ត្រីជាន់ខ្ពស់ក្រុមសកម្មប្រយុទ្ធមួយនេះ បានប្រាប់សារព័ត៌មានរ៉យទ័រថា ក្រុមហេសបូឡាបានត្រៀមខ្លួនរួចជាស្រេចដើម្បីជួបពិភាក្សាជាមួយប្រធានាធិបតីលីបង់ អំពីអាវុធរបស់ខ្លួន ប្រសិនបើអ៊ីស្រាអែល ព្រមដកកងកម្លាំងចេញពីភាគខាងត្បូងលីបង់ ហើយបញ្ឈប់ការវាយប្រហារ។

ប្រភពនយោបាយលីបង់បាននិយាយថា ប្រធានាធិបតីលីបង់ថ្មីដែលគាំទ្រដោយសហរដ្ឋអាមេរិក គឺលោក Joseph Aoun បានប្តេជ្ញាកាលខែមករាថា នឹងបង្កើតភាពផ្តាច់មុខរបស់រដ្ឋលើការគ្រប់គ្រងអាវុធ ហើយលោកក៏មានបំណងបើកកិច្ចពិភាក្សាជាមួយក្រុមហេសបូឡា លើឃ្លាំងអាវុធរបស់ខ្លួនក្នុងពេលឆាប់ៗនេះផងដែរ។

ការពិភាក្សាអំពីការរំសាយអាវុធបានបង្កើនល្បឿន ចាប់តាំងពីតុល្យភាពអំណាចត្រូវបំផ្លាញដោយសង្រ្គាមកាលពីឆ្នាំមុន ជាមួយអ៊ីស្រាអែល និងការបណ្តេញសម្ព័ន្ធមិត្តស៊ីរី របស់ក្រុមហេសបូឡា គឺលោកអតីតប្រធានាធិបតី Bashar al-Assad។ មន្ត្រីជាន់ខ្ពស់ក្រុមហេសបូឡានិយាយថា ក្រុមនេះត្រៀមខ្លួនជាស្រេចហើយដើម្បីពិភាក្សាពីអាវុធរបស់ខ្លួន ក្នុងបរិបទនៃយុទ្ធសាស្ត្រការពារជាតិ ប៉ុន្តែរឿងនេះគឺតម្រូវឱ្យអ៊ីស្រាអែល ដកទ័ពរបស់ពួកគេចេញពីកំពូលភ្នំចំនួន៥ នៅភាគខាងត្បូងលីបង់ជាមុនសិន។

គួរឱ្យដឹងថា ក្រុមហេសបូឡាបានចុះខ្សោយយ៉ាងខ្លាំងដោយសារជម្លោះឆ្នាំ២០២៤ ជាមួយអ៊ីស្រាអែល នៅពេលដែលមេដឹកនាំជាន់ខ្ពស់របស់ខ្លួនជាច្រើន និងយុទ្ធជនរាប់ពាន់នាក់ត្រូវសម្លាប់ ហើយឃ្លាំងអាវុធរ៉ូកែតជាច្រើនត្រូវបំផ្លាញ៕