ការខ្វែងគំនិតគ្នារវាងសហរដ្ឋអាមេរិក និងសម្ព័ន្ធអឺរ៉ុប លើរឿងជាច្រើន រាប់ចាប់ពីពាណិជ្ជកម្ម រហូតដល់ការកាត់បន្ថយផលប៉ះពាល់នៃទណ្ឌកម្មរុស្ស៊ី អាចមានផលវិបាកធំធេងសម្រាប់កិច្ចចរចាសន្តិភាពអ៊ុយក្រែន។ សង្គ្រាមពន្ធនឹងបង្កតែភាពស្មុគស្មាញប៉ុណ្ណោះ ដោយលោកប្រធានាធិបតីអាមេរិក Donald Trump ប្រហែលជាត្រូវថ្លឹងថ្លែងដើម្បីបំបែកភាពជាប់គាំងទាំងនេះ។

ចាប់តាំងពីវិបត្តិអ៊ុយក្រែន បានផ្ទុះឡើងដំបូងនៅក្នុងឆ្នាំ២០១៤ ការបែកបាក់មួយបានកើតឡើងនៅក្នុងសម្ព័ន្ធភាពលោកខាងលិច ជុំវិញគោលនយោបាយដាក់ទណ្ឌកម្មចំពោះរុស្ស៊ី។

កិច្ចចរចាសន្តិភាពដែលសម្របសម្រួលដោយអាមេរិក នៅអារ៉ាប៊ីសាអ៊ូឌីត កាលពីចុងខែមុន បានធ្វើឱ្យរុស្ស៊ី និងអ៊ុយក្រែន កាន់តែខិតទៅជិតការស្តារឡើងវិញនូវកិច្ចព្រមព្រៀងគ្រាប់ធញ្ញជាតិសមុទ្រខ្មៅឆ្នាំ២០២២ តាមរយៈបទឈប់បាញ់ដែនសមុទ្រ។ ប៉ុន្តែអ្វីដែលសន្យាថាជាជំហានដ៏មានប្រយោជន៍មួយ ពេលនេះត្រូវជាប់គាំងដោយសារកិច្ចប្រឹងប្រែងរបស់អ៊ឺរ៉ុប និងអ៊ុយក្រែន ក្នុងការរារាំងសម្បទានតិចតួចដល់រុស្ស៊ី ព្រមទាំងរឿងដកទណ្ឌកម្ម។

រឿងខ្វែងគំនិតគ្នាជាពិសេសជុំវិញបទឈប់បាញ់ដែនសមុទ្រនេះ គឺត្រូវបានបង្កឡើងដោយសំណួរថា តើត្រូវអនុញ្ញាតឱ្យធនាគាររុស្ស៊ីដ៏ធំមួយចូលប្រើប្រាស់មានកំណត់ខ្លះ ទៅកាន់សេវាផ្ញើប្រាក់ SWIFT ដែរឬទេ ដោយនោះជាជំហានមួយដែលនឹងអនុញ្ញាតឱ្យអ្នកនាំចូល ធ្វើការទូទាត់សម្រាប់ការនាំចេញកសិផលរបស់រុស្ស៊ី កាន់តែងាយស្រួល។

បន្ថែមពីលើការបាក់បែករវាងទីក្រុងវ៉ាស៊ីនតោន និងប្លុកអឺរ៉ុប ដែលអាចប៉ះពាល់សន្តិភាពអ៊ុយក្រែននេះ គឺសេចក្តីប្រកាសពន្ធបដិការដ៏ទូលំទូលាយនៅថ្ងៃទី០២ ខែមេសា របស់លោក Trump ប្រឆាំងនឹងសហភាពអឺរ៉ុប និងប្រទេសដទៃទៀត ខណៈដែលរុស្ស៊ី នឹងបន្តឈរមើលភាពជូរចត់កាន់តែខ្លាំងឡើងលើទំនាក់ទំនងរវាងសម្ព័ន្ធមិត្តទាំងនេះ៕