អ្នកវិភាគនិយាយថា ផលប៉ះពាល់ខ្លាំងនៃការដំឡើងពន្ធថ្មីរបស់ប្រធានាធិបតីសហរដ្ឋអាមេរិក លោក Donald Trump លើកំណើនសេដ្ឋកិច្ចក្នុងប្រទេសមានសេដ្ឋកិច្ចធំៗនៅអាស៊ីអាគ្នេយ៍ ដែលត្រូវបានគេរំពឹងថានឹងបង្ហាញការសាកល្បងដ៏តឹងតែងសម្រាប់ប្រទេសទាំងនេះ។

រដ្ឋាភិបាលមួយចំនួន បានបញ្ជាក់រួចហើយពីបំណងរបស់ពួកគេដើម្បីចរចារកិច្ចព្រមព្រៀងជាមួយរដ្ឋបាល លោក Trump ជាថ្នូរនឹងការដំឡើងពន្ធទាប។ អ្នកជំនាញបានព្រមានថា ប្រសិនបើបញ្ហានេះបរាជ័យ ពួកគេក៏ប្រហែលជាចាំបាច់ត្រូវដាក់ចេញនូវវិធានការសារពើពន្ធមួយចំនួន ដើម្បីទប់ស្កាត់ផលប៉ះពាល់ដល់ប្រជាជនរបស់ខ្លួន។

មេដឹកនាំនៃប្រទេសឥណ្ឌូណេស៊ី ម៉ាឡេស៊ី ថៃ និងវៀតណាម បានកំណត់កំណើនសេដ្ឋកិច្ចស្ថិរភាពជាអាទិភាពសំខាន់ក្នុងអំឡុងពេលអាណត្តិរបស់ខ្លួននៅក្នុងរដ្ឋាភិបាល ខណៈសេដ្ឋកិច្ចវិទូកាត់បន្ថយការព្យាករណ៍កំណើន។

ប្រទេសម៉ាឡេស៊ី ក្នុងនាមជាប្រធានសមាគមប្រជាជាតិអាស៊ីអាគ្នេយ៍ (អាស៊ាន)បច្ចុប្បន្ន កំពុងសម្របសម្រួលការឆ្លើយតបជាមួយមេដឹកនាំក្នុងតំបន់ផ្សេងទៀត «ដើម្បីចូលរួមដោយការស្ថាបនា» ជាមួយសហរដ្ឋអាមេរិក។ ទីក្រុង Putrajaya នឹងធ្វើជាម្ចាស់ផ្ទះកិច្ចប្រជុំរដ្ឋមន្ត្រីសេដ្ឋកិច្ចអាស៊ានពិសេស នៅថ្ងៃព្រហស្បតិ៍ ទី១០ មេសា ដើម្បីដោះស្រាយផលប៉ះពាល់នៃការដំឡើងពន្ធថ្មីរបស់សហរដ្ឋអាមេរិកលើពាណិជ្ជកម្ម និងការវិនិយោគក្នុងតំបន់ និងដើម្បីសម្របសម្រួលការឆ្លើយតបជារួម។

ទោះជាយ៉ាងណា អ្នកវិភាគមួយចំនួនបាននិយាយថា អាស៊ានជាប្លុកមួយ ពុំត្រូវបានអាមេរិក មើលឃើញថាជាតួអង្គសកលសំខាន់នោះទេ ហើយស្ថានភាពពាណិជ្ជកម្មខុសប្លែកគ្នារបស់ប្រទេសទាំងនេះ បង្ហាញថា អាចមានតួនាទីស្ថាបនាបន្ថែមទៀតសម្រាប់រដ្ឋជាសមាជិកមួយចំនួន ដើម្បីចរចាជាមួយទីក្រុងវ៉ាស៊ីនតោន ដោយផ្ទាល់។