សារព័ត៌មានរដ្ឋ Kan TV បានរាយការណ៍ថា តុលាការយុត្តិធម៌ជាន់ខ្ពស់របស់អ៊ីស្រាអែល កាលពីថ្ងៃអង្គារ បានចេញដីកាបណ្តោះអាសន្ន ដោយសម្រេចថា លោក Ronen Bar ដែលជាប្រធានសេវាសន្តិសុខផ្ទៃក្នុង Shin Bet នឹងបន្តនៅក្នុងតួនាទីរបស់លោក រហូតដល់ការសម្រេចមួយផ្សេងទៀតរបស់តុលាការ។  

ដីកានេះបានធ្វើឡើង បន្ទាប់ពីសវនាការរយៈពេលជាង ១០ម៉ោង លើញត្តិដែលដាក់ដោយក្រុមបក្សប្រឆាំង និងអង្គការផ្សេងទៀតប្រឆាំងនឹងការសម្រេចរបស់រដ្ឋាភិបាល កាលពីថ្ងៃទី ២១ ខែមីនា ក្នុងការ     បណ្តេញលោក Ronen Bar ចេញពីតំណែង ដោយសារតែ «ខ្វះការជឿទុកចិត្ត»។

ជាផ្នែកនៃសេចក្តីសម្រេចនេះ តុលាការក៏បានបញ្ជាឲ្យរដ្ឋាភិបាលមិនឲ្យពន្លឿនវិធានការណាមួយ ទាក់ទងនឹងការបញ្ចប់អាណត្តិរបស់លោក Ronen Bar  រួមទាំងការប្រកាសតែងតាំងអ្នកជំនួស ឬប្រធានស្តីទី ហើយថា អំណាចរបស់លោក មិនគួរត្រូវបានធ្វើឲ្យចុះខ្សោយនោះទេ។

តុលាការក៏បានសម្រេចថា រដ្ឋាភិបាល និងអគ្គមេធាវី លោក Gali Baharav-Miara អាចដាក់សេចក្តីថ្លែងការណ៍រួមស្តីពីដំណោះស្រាយមួយបានត្រឹមថ្ងៃទី២០ ខែមេសា ប្រសិនបើសម្រេច។

ការិយាល័យរបស់នាយករដ្ឋមន្ត្រីលោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយនៅក្នុងសេចក្តីថ្លែងការណ៍មួយថា ការសម្រេចរបស់តុលាការ គឺជារឿង «គួរឲ្យឆ្ងល់» ដោយសារតែចៅក្រម បានរំលឹកឡើងវិញជាច្រើនដងថា សិទ្ធិអំណាចរបស់រដ្ឋាភិបាល ក្នុងការដកប្រធាន Shin Bet ចេញពីតំណែង គឺមិនមានជម្លោះទេ។ ការិយាល័យនេះ បានបន្ថែមថា លោក ណេតាន់យាហ៊ូ នឹងបន្តសម្ភាសន៍បេក្ខជនសម្រាប់តំណែងនេះ។