ក្រុមបាតុកររាប់ពាន់នាក់ បានប្រមូលផ្តុំគ្នាតវ៉ានៅក្នុងរដ្ឋធានីនៃប្រទេសហុងគ្រី សម្រាប់សប្តាហ៍ទី៤ ជាប់ៗគ្នា កាលពីថ្ងៃអង្គារ (០៨ មេសា) ដើម្បីសម្តែងការប្រឆាំងទៅនឹងច្បាប់ថ្មីដែលត្រូវបានអនុម័តដោយរដ្ឋាភិបាលជាតិនិយមរបស់លោកនាយករដ្ឋមន្រ្តី Viktor Orban ដែលហាមឃាត់ព្រឹត្តិការណ៍ក្បួនដង្ហែតាមដងផ្លូវសម្រាប់អ្នកស្រឡាញ់ភេទដូចគ្នា ឬហៅថាសហគមន៍ LGBTQ+។

ច្បាប់ហាមឃាត់ ដែលឆ្លងសភាបានយ៉ាងលឿនកាលពីខែមីនានេះ ហាមប្រាមព្រឹត្តិការណ៍ដែលបង្ហាញពីការស្រឡាញ់ភេទដូចគ្នាទៅសល់បុគ្គលអាយុក្រោម ១៨ឆ្នាំ។ សកម្មភាពនេះកើតឡើងស្របពេលមានការចោទប្រកាន់កាន់តែខ្លាំងឡើងថា រដ្ឋាភិបាលរបស់លោក Orbán កំពុងធ្វើឱ្យខូចលទ្ធិប្រជាធិបតេយ្យនៅមុនការបោះឆ្នោតជាតិនៅឆ្នាំក្រោយ។

បាតុករបានសម្រុកតវ៉ាពាសពេញស្ពាន Erzsébet នៅលើទន្លេ Danube ដោយទាមទារឱ្យលុបចោលច្បាប់នេះ។ បាតុករមួយចំនួនគ្រោងនឹងស្នាក់នៅលើស្ពាននោះពេញមួយយប់ដើម្បីតវ៉ា ហើយមានរបាយការណ៍អំពីផែនការបិទបណ្ដាស្ពាន Danube ដ៏ធំជាច្រើនខ្សែរ ខណៈពុំមានអំពើហិង្សាត្រូវបានគេរាយការណ៍ទេក្នុងអំឡុងការតវ៉ានោះ។

បាតុករបានផ្គើននឹងបទបញ្ជារបស់នគរបាលឱ្យបំបែកគ្នាចេញពីស្ពាន និងផ្លូវសំខាន់ៗរបស់ទីក្រុងប៊ុយដាប៉ែស។ នៅក្នុងករណីដ៏កម្រមួយនៃការតវ៉ានៅខាងក្រៅរដ្ឋធានី បាតុករជាច្រើនរយនាក់នៅក្នុងទីក្រុង Miskolc ដែលជាទីក្រុងមួយនៅភាគខាងកើតហុងគ្រី ក៏បានដើរតាមផ្លូវកាលពីថ្ងៃអង្គារ ដើម្បីប្រឆាំងនឹងច្បាប់នេះផងដែរ៕