អ៊ីស្រាអែល បាននិយាយកាលពីថ្ងៃពុធថា កងទ័ពរបស់ខ្លួនដណ្តើមយកបាន «តំបន់ធំៗ» នៅតំបន់ហ្កាហ្សា និងកំពុងធ្វើឱ្យដែនដីប៉ាឡេស្ទីន «កាន់តែតូច និងឯកោ» ខណៈការវាយប្រហារតាមអាកាសទៅលើប្លុកលំនៅឋាន បានសម្លាប់មនុស្សយ៉ាងហោចណាស់២៣នាក់។

លោក Katz និយាយថា «តំបន់ធំៗ កំពុងត្រូវបានរឹបអូស និងបានបន្ថែមចូលទៅតំបន់សន្តិសុខរបស់អ៊ីស្រាអែល ដោយទុកឱ្យតំបន់ហ្កាហ្សាកាន់តែតូចនិងកាន់តែឯកោ ក្នុងអំឡុងដំណើរទស្សនកិច្ចទៅកាន់ច្រករបៀងMorag ដែលទើបប្រកាសថ្មីរវាងទីក្រុងភាគខាងត្បូងទីក្រុងRafah និងទីក្រុង Khan Younis ។

លោក Katz បានសង្កត់ធ្ងន់ថា អ៊ីស្រាអែលនឹងបន្តដាក់សម្ពាធកាន់តែខ្លាំងលើតំបន់ហ្កាហ្សា «រហូតដល់ចំណាប់ខ្មាំងទាំងអស់ត្រូវបានដោះលែង ហើយក្រុមហាម៉ាសត្រូវបានកម្ចាត់»។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីដើមឆ្នាំនេះ បានស្នើផែនការអភិវឌ្ឍតំបន់ហ្កាហ្សា ទៅជា «តំបន់ឆ្នេរលំហែមជ្ឈិមបូព៌ា» ខណៈរៀបចំឲ្យប្រជាជនតំបន់នេះភៀសខ្លួនចេញទៅកន្លែងផ្សេង។

ទន្ទឹមនឹងនេះ ប្រធានាធិបតីបារាំង លោក Emmanuel Macron បាននិយាយថា ប្រទេសបារាំងគ្រោងនឹងទទួលស្គាល់រដ្ឋប៉ាឡេស្ទីន នៅ«ប៉ុន្មានខែខាងមុខនេះ» ជាចំណាត់ការមួយធ្វើឲ្យមានបញ្ហាប្រឈមដោយអ៊ីស្រាអែល ដែលតែងតែមានចរិកប្រឆាំង ដោយទទូចថា ចំណាត់ការដោយរដ្ឋបរទេសគឺវាឆាប់រហ័សពេក។