ក្រុមរដ្ឋមន្ត្រីសេដ្ឋកិច្ចនៃប្លុកតំបន់អាស៊ាន បាននិយាយនាថ្ងៃព្រហស្បតិ៍ (១០ មេសា) នេះថា បណ្ដាប្រទេសអាស៊ីអាគ្នេយ៍កំពុងជំរុញឱ្យមានកិច្ចពិភាក្សាជាមួយសហរដ្ឋអាមេរិក លើពន្ធពាណិជ្ជកម្ម ហើយនឹងមិនដាក់វិធានការសងសឹកឡើយ។

មុនពេលការផ្អាករយៈពេល ៩០ថ្ងៃត្រូវបានប្រកាសដោយលោកប្រធានាធិបតីអាមេរិក Donald Trump លើការអនុវត្តពន្ធរបស់អាមេរិក ប្រទេសចំនួន៦ ក្នុងចំណោមប្រទេសអាស៊ីអាគ្នេយ៍ចំនួន៩ ដែលត្រូវដាក់គោលដៅដោយរដ្ឋបាលអាមេរិក ជាមួយនឹងពន្ធធំជាងការរំពឹងទុកចន្លោះពី ៣២% ដល់ ៤៩%។

បណ្ដារដ្ឋមន្ត្រីសេដ្ឋកិច្ចរបស់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន បាននិយាយនៅក្នុងសេចក្តីថ្លែងការណ៍មួយស្ដីពីក្ដីបារម្ភពន្ធ និងផលប៉ះពាល់ថា "អាស៊ានបង្ហាញពីចេតនារួមក្នុងការចូលរួមក្នុងកិច្ចសន្ទនាដោយស្មោះត្រង់ និងស្ថាបនាជាមួយសហរដ្ឋអាមេរិក ដើម្បីដោះស្រាយកង្វល់ទាក់ទងនឹងពាណិជ្ជកម្ម។ ទំនាក់ទំនងដោយបើកចំហ និងការសហការ នឹងមានសារៈសំខាន់ណាស់ក្នុងការធានាឱ្យមានទំនាក់ទំនងប្រកបដោយតុល្យភាព និងនិរន្តរភាព"។

បន្ទាប់ពីកិច្ចប្រជុំនៅថ្ងៃព្រហស្បតិ៍ ក្រុមរដ្ឋមន្ត្រីបាននិយាយថា ពួកគេបានបញ្ជាក់ជាថ្មីនូវការគាំទ្ររបស់ខ្លួនចំពោះប្រព័ន្ធពាណិជ្ជកម្មពហុភាគី ដែលអាចព្យាករបាន យុត្តិធម៌ និងផ្អែកលើច្បាប់។ គួរឱ្យដឹងថា សមាជិកទាំង១០ប្រទេសរបស់អាស៊ាន រួមគ្នាបង្កើតបានជាសេដ្ឋកិច្ចធំជាងគេទី៥ របស់ពិភពលោក ហើយសមាជិករបស់ប្លុកនេះពឹងផ្អែកយ៉ាងខ្លាំងលើការនាំចេញជាកត្តាជំរុញកំណើន៕