នៅថ្ងៃព្រហស្បតិ៍នេះ នគរបាលអង់គ្លេស បានចាប់ខ្លួនប្រធានក្រុមបរិស្ថានអង់គ្លេស ជាមួយសកម្មជន ៥នាក់ផ្សេងទៀត ក្រោយពួកគេយកថ្នាំលាបពណ៌ឈាមចាក់ចូលទៅក្នុងស្រះមុខស្ថានទូតសហរដ្ឋអាមេរិកប្រចាំនៅទីក្រុងឡុងដ្រ៍ ដើម្បីតវ៉ាប្រឆាំងការលក់អាវុធរបស់ពួកគេដល់អ៊ីស្រាអែល ។

ក្រុម Greenpeace និយាយថា លោក Will McCallum ដែលជាប្រធានក្រុមយុទ្ធនាការបរិស្ថាន នៅចក្រភពអង់គ្លេស ហើយនិងសកម្មជនផ្សេងទៀត បានក្លែងខ្លួនធ្វើជាអ្នកដឹកជញ្ជូនជិះកង់រ៉ឺម៉ក រួចយកថ្នាំលាបពណ៌ឈាមទៅចាក់ក្នុងស្រះមុខស្ថានទូតអាមេរិក ។

លោក McCallum និងសកម្មជនផ្សេងទៀត ត្រូវបានចាប់ខ្លួន ពីបទសង្ស័យសមគំនិតគ្នាបង្កឲ្យមានផលប៉ះពាល់ឧក្រិដ្ឋកម្ម ដែលអាចនឹងជាប់ពន្ធនាគាររយៈពេល ១០ឆ្នាំ បើសិនជាកាត់ទោស ។

នគរបាលក្រុងឡុងដ្រ៍ ពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយ ជុំវិញករណីមួយនេះ ។

ការវាយប្រហាររបស់អ៊ីស្រាអែល ត្រូវបានធ្វើឡើងលើតំបន់ហ្កាហ្សា ក្រោយក្រុមហាម៉ាស វាយប្រហារតំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣កន្លងទៅ ដោយបានសម្លាប់មនុស្ស ១.២០០នាក់ និងចាប់ចំណាប់ថ្នូរ ២៥១នាក់ ។ 

ក្រុមអាជ្ញាធរសុខភាពប៉ាឡេស្ទីន និយាយថា ការវាយប្រហាររបស់អ៊ីស្រាអែលនៅតំបន់ហ្កាហ្សា បានសម្លាប់មនុស្សជាង ៥ម៉ឺននាក់ ៕