អូទ្រីស៖ ក្រុមមន្ត្រីបាននិយាយកាលពីថ្ងៃសុក្រថា អ្នកការទូតដែលបានចរចានៅទីក្រុងវីយែន ដើម្បីស្តារឡើងវិញកិច្ចព្រមព្រៀងនុយក្លេអ៊ែរឆ្នាំ២០១៥ របស់ប្រទេសអ៊ីរ៉ង់ជាមួយប្រទេសមហាអំណាចបានផ្អាក បន្ទាប់ពីកិច្ចចរចារយៈពេល ៥ថ្ងៃដើម្បីពិគ្រោះយោបល់ជាមួយរដ្ឋាភិបាលរបស់ពួកគេ ហើយនឹងចាប់ផ្តើមប្រជុំឡើងវិញនៅសប្ដាហ៍ក្រោយ។
មន្ត្រីសហភាពអឺរ៉ុបដែលជាប្រធានកិច្ចប្រជុំបាននិយាយថា មានការរីកចម្រើនមួយចំនួន ប៉ុន្តែការរួបរួមក្នុងគោលដៅតែមួយគឺជាការចាំបាច់។ អ្នកការទូតសហភាពអឺរ៉ុបលោក Enrique Mora បាននិយាយថា យើងបានកំណត់បញ្ហាប្រឈមនៅខាងមុខ។ អ្វីដែលហៅថា ផែនការសកម្មភាពគ្រប់ជ្រុងជ្រោយរួម ឬ JCPOA មានប្រសិទ្ធភាពលើការជួយគាំទ្រជីវិត ចាប់តាំងពីសហរដ្ឋអាមេរិកបានដកខ្លួនចេញក្រោមយុទ្ធនាការសម្ពាធខ្ពស់របស់ប្រធានាធិបតីលោក Donald Trump មកលើទីក្រុងតេអេរ៉ង់ក្នុងឆ្នាំ២០១៨។ អ្នកការទូតសហភាពអឺរ៉ុបលោក Enrique Mora បាននិយាយថា ការស្តារឡើងវិញនៃកិច្ចព្រមព្រៀង នឹងតម្រូវឱ្យប្រទេសអ៊ីរ៉ង់បំពេញតាមការសន្យារបស់ខ្លួនក្រោមកិច្ចព្រមព្រៀងនេះ ហើយនាំសហរដ្ឋអាមេរិកត្រឡប់មករកការអនុវត្តន៍តាមច្បាប់ពេញលេញ មានន័យថាទីក្រុងវ៉ាស៊ីនតោននឹងត្រូវដកទណ្ឌកម្មសេដ្ឋកិច្ចធ្ងន់ធ្ងរដែលខ្លួនបានដាក់លើទីក្រុងតេអេរ៉ង់។
កិច្ចចរចាមានគោលបំណងស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ២០១៥ រវាងប្រទេសអ៊ីរ៉ង់ និងមហាអំណាចពិភពលោកមួយចំនួនដូចជា អង់គ្លេស ចិន បារាំង អាល្លឺម៉ង់ រុស្ស៊ី និងសហរដ្ឋអាមេរិកដែលបានបន្តកាលពីថ្ងៃចន្ទ បន្ទាប់ពីប្រទេសអ៊ីរ៉ង់បានផ្អាកកាលពីខែមិថុនា ក្រោយការបោះឆ្នោតរបស់ប្រធានាធិបតីប្រកាន់តឹងរឹងលោក Ebrahim Raisi៕
អត្ថបទ៖ ប៊ុនថន