អង់គ្លេស៖ អ្នកធ្វើដំណើរត្រលប់មកពីប្រទេសអាហ្វ្រិកខាងត្បូងដែលសង្ឃឹមថា នឹងទៅកាន់ចក្រភពអង់គ្លេសបានជាប់គាំងដំណើរដោយកង្វះសណ្ឋាគារដាក់ឱ្យធ្វើចត្តាឡីស័ក បន្ទាប់ពីវិធានការថ្មីរបស់រដ្ឋាភិបាលចក្រភពអង់គ្លេសក្នុងការទប់ស្កាត់វីរុស COVID-19 កំពុងបង្ខំឱ្យការធ្វើចត្តាឡីស័កជាកាតព្វកិច្ចនៅពេលមកដល់។
អ្នកសម្រាកវិស្សមកាលជាច្រើននាក់បានឃើញថា ខ្លួនឯងមិនអាចត្រឡប់ទៅចក្រភពអង់គ្លេសវិញបានទេ និងមិនអាចចូលរួមបុណ្យណូអែលក្នុងពេលដាក់ឱ្យធ្វើចត្តាឡីស័ក ដោយសារតែការផ្លាស់ប្តូរភ្លាមៗចំពោះវិធានការ សម្រាប់អ្នកធ្វើដំណើរមកពីបណ្ដាប្រទេសអាហ្វ្រិកខាងត្បូង ខណៈលេចចេញវីរុសបម្លែងខ្លួនថ្មី Omicron ដែលប្រែប្រួលខ្ពស់។ លោកស្រី Hannah Pickersgill បានមើលឃើញថា លោកស្រីបានជាប់គាំងដំណើរនៅប្រទេសអាហ្វ្រិកខាងត្បូងជាមួយក្រុមគ្រួសារ ហើយប្រឈមនឹងការបង់ប្រាក់រាប់ពាន់ផោនដើម្បីអាចអនុវត្តតាមវិធានការថ្មី។ លោកស្រីនិយាយពីដំណើរការនៃការកក់សណ្ឋាគារសម្រាប់ធ្វើចត្តាឡីស័កថា មានការរំខានដោយការខ្វះសណ្ឋាគារ។ បន្ទាប់ពីការលេចចេញវីរុសបម្លែងខ្លួនថ្មី Omicron នៃវីរុស COVID-19 បណ្ដាប្រទេសអាហ្វ្រិកភាគខាងត្បូងមួយចំនួនត្រូវបានដាក់ក្នុងបញ្ជីក្រហម ដែលតម្រូវឱ្យអ្នកធ្វើដំណើរមកកាន់ចក្រភពអង់គ្លេស ត្រូវអនុវត្តនីតិវិធីមួយចំនួនរួមទាំងការដាក់ឱ្យធ្វើចត្តាឡីស័ករយៈពេល ១៤ថ្ងៃ៕
អត្ថបទ៖ ប៊ុនថន