ប្រមុខសហភាពអឺរ៉ុប (EU) លោកស្រី Ursula von der Leyen បានប្រាប់សារព័ត៌មាន Financial Times កាលពីថ្ងៃព្រហស្បតិ៍ (ទី១០ ខែមេសា) ថា EU បានត្រៀមខ្លួនរួចជាស្រេចក្នុងការប្រើប្រាស់វិធានការពាណិជ្ជកម្មដ៏មានឥទ្ធិពលបំផុតរបស់ខ្លួន ហើយអាចនឹងដាក់បន្ទុកពន្ធដ៏ធ្ងន់លើក្រុមហ៊ុនឌីជីថលរបស់សហរដ្ឋអាមេរិក ប្រសិនបើការចរចាជាមួយប្រធានាធិបតីអាមេរិក លោក Donald Trump បរាជ័យ។

សេចក្ដីរាយការណ៍របស់សារព័ត៌មាននេះ បានបន្ថែមថា EU នឹងស្វែងរកកិច្ចព្រមព្រៀងដែលមានតុល្យភាពទាំងស្រុងជាមួយទីក្រុងវ៉ាស៊ីនតោន អំឡុងការផ្អាករយៈពេល ៩០ថ្ងៃរបស់លោក Trump ក្នុងការអនុវត្តពន្ធនាំចូលបន្ថែម។

ប៉ុន្តែក្នុងពេលជាមួយគ្នា លោកស្រីបានព្រមានថា ប្លុកក៏បានត្រៀមខ្លួនរួចជាស្រេច ក្នុងការពង្រីកយ៉ាងខ្លាំងក្លានូវសង្រ្គាមពាណិជ្ជកម្មឆ្លងមហាសមុទ្រអាត្លង់ទិក ចំពោះសេវាកម្មនានា ប្រសិនបើកិច្ចពិភាក្សាទាំងនោះបរាជ័យ ដែលអាចរួមបញ្ចូលទាំងការយកពន្ធលើប្រាក់ចំណូលពីការផ្សាយពាណិជ្ជកម្មឌីជីថល ដែលនឹងប៉ះពាល់ដល់ក្រុមបច្ចេកវិទ្យាជាច្រើន ដូចជា Meta និង Google របស់ Alphabet ជាដើម។

លោកស្រី der Leyen បាននិយាយថា សង្គ្រាមពាណិជ្ជកម្មរបស់លោក Trump បានបណ្តាលឲ្យមាន «ការប្រែប្រួលឡើងចុះទាំងស្រុង នៅក្នុងពាណិជ្ជកម្មសកល»។ លោកស្រីបានបន្ថែមថា៖ «វាជាចំណុចរបត់មួយជាមួយសហរដ្ឋអាមេរិក ដោយគ្មានអ្វីត្រូវសង្ស័យឡើយ។ យើងនឹងមិនត្រលប់ទៅស្ថានភាពដដែលទៀតទេ»។

លោកស្រីប្រធានបានបញ្ជាក់ថា គណៈកម្មការនេះធ្លាប់បានព្យាយាមចរចាជាមួយអាមេរិក ប៉ុន្តែត្រូវបានប្រាប់ឲ្យរង់ចាំរហូតដល់ការប្រកាសរបស់លោក Trump នៅថ្ងៃទី២ ខែមេសា ដែលបានដាក់ពន្ធ ២០ភាគរយលើ EU៕