រដ្ឋមន្ត្រីការបរទេសអាមេរិក លោក Marco Rubio ថ្ងៃព្រហស្បតិ៍ (ទី១០ ខែមេសា) បាននិយាយថា សហរដ្ឋអាមេរិក នឹងជួបពិភាក្សាដោយផ្ទាល់ជាមួយអ៊ីរ៉ង់ នៅចុងសប្តាហ៍នេះ ដើម្បីពិភាក្សាអំពីកម្មវិធីនុយក្លេអ៊ែររបស់ទីក្រុងតេអេរ៉ង់។

កិច្ចពិភាក្សា រវាងបេសកជនពិសេសអាមេរិក លោក Steve Witkoff និងមេដឹកនាំជាន់ខ្ពស់អ៊ីរ៉ង់ គ្រោងធ្វើនៅថ្ងៃសៅរ៍ (ទី១២ ខែមេសា) ក្នុងប្រទេសអូម៉ង់។ ហើយអំឡុងកិច្ចប្រជុំគណៈរដ្ឋមន្ត្រីដែលដឹកនាំដោយលោកប្រធានាធិបតី Donald Trump លោក Rubio បាននិយាយថា៖ «យើងសង្ឃឹមថា ការជជែកគ្នានេះ នឹងនាំទៅរកសន្តិភាព។ យើងបានធ្វើឲ្យមានភាពច្បាស់លាស់នូវអ្វីដែលអ៊ីរ៉ង់នឹងគ្មានថ្ងៃផលិតបានអាវុធនុយក្លេអ៊ែរ ហើយខ្ញុំយល់ថា នោះជាអ្វីដែលនាំកិច្ចប្រជុំនេះកើតឡើង»។ 

លោក Trump កាលពីថ្ងៃចន្ទដើមសប្ដាហ៍នេះ បានធ្វើការប្រកាសដ៏គួរឲ្យភ្ញាក់ផ្អើលមួយថា សហរដ្ឋអាមេរិក និងអ៊ីរ៉ង់ បានត្រៀមខ្លួនរួចជាស្រេច ដើម្បីចាប់ផ្តើមកិច្ចចរចាដោយផ្ទាល់ ស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ នៅថ្ងៃសៅរ៍ ដោយព្រមានថា អ៊ីរ៉ង់នឹងស្ថិតក្នុង «គ្រោះថ្នាក់ធំ» ប្រសិនបើកិច្ចចរចាមិនទទួលបានជោគជ័យ។

សេចក្តីប្រកាសនេះបានធ្វើឲ្យមានការយល់ច្រលំមួយចំនួន ដោយសារតែអ៊ីរ៉ង់ បានប្រាប់ថា ការចរចានឹងធ្វើដោយប្រយោលជាមួយអ្នកសម្រុះសម្រួលអូម៉ង់។ តែយ៉ាងណាក្ដី មន្ត្រីសហរដ្ឋអាមេរិកម្នាក់ដែលដឹងពីផែនការនេះ បានបង្ហើបឲ្យដឹងថា គណៈប្រតិភូទាំង២ នឹងនៅក្នុងបន្ទប់តែមួយ សម្រាប់កិច្ចពិភាក្សានេះ៕