លោកឧត្តមសេនីយ៍ឯក Keith Kellogg បេសកជនពិសេសរបស់ប្រធានាធិបតីអាមេរិក Donald Trump ប្រចាំនៅអ៊ុយក្រែន បានលើកឡើងថា កងទ័ពអង់គ្លេស និងបារាំងអាចទទួលខុសត្រូវលើតំបន់គ្រប់គ្រង នៅប្រទេសអ៊ុយក្រែន។

នៅក្នុងបទសម្ភាសន៍ជាមួយសារព័ត៌មាន The Times ដែលបានចេញផ្សាយនៅថ្ងៃសៅរ៍ (ទី១២ ខែមេសា) នេះ លោកឧត្តមសេនីយ៍ឯក Kellogg បានស្នើថា ប្រទេសទាំងនេះ អាចមានតំបន់ទទួលខុសត្រូវ នៅភាគខាងលិចនៃទន្លេ Dnipro ដែលជាផ្នែកមួយនៃ «កងកម្លាំងធានាសន្តិភាព» ជាមួយនឹងតំបន់គ្មានយោធា ដែលខណ្ឌចែកពួកគេពីតំបន់កាន់កាប់ដោយរុស្ស៊ី នៅភាគខាងកើត។

លោកបាននិយាយថា៖ «អ្នកស្ទើរតែអាចធ្វើឲ្យវាមើលទៅដូចជាអ្វីដែលបានកើតឡើងជាមួយទីក្រុងប៊ែរឡាំង បន្ទាប់ពីសង្គ្រាមលោកលើកទី២ នៅពេលដែលអ្នកមានតំបន់រុស្ស៊ី តំបន់បារាំង និងអង់គ្លេស ហើយនិងតំបន់អាមេរិក»។ ក្រោយមក លោកបានបញ្ជាក់នៅលើបណ្ដាញសង្គម X ថា សហរដ្ឋអាមេរិកនឹងមិនផ្តល់ជំនួយកងទ័ពទេ។

លោក Kellogg បានបន្ថែមថា៖ «អ្នកស្ថិតនៅភាគខាងលិចនៃទន្លេ (Dnipro) ដែលជាឧបសគ្គដ៏សំខាន់។ កម្លាំងនេះនឹងមិនបង្កហេតុអ្វីទាំងអស់ ចំពោះប្រទេសរុស្ស៊ី»។ ជាមួយគ្នានេះ ហើយលោកបានលើកឡើងថា តំបន់គ្មានយោធាអាចត្រូវបានអនុវត្តតាមខ្សែបន្ទាត់នៃការគ្រប់គ្រងដែលមានស្រាប់នៅភាគខាងកើតអ៊ុយក្រែន។

ដើម្បីធ្វើឲ្យប្រាកដថា កងកម្លាំងអង់គ្លេស បារាំង អ៊ុយក្រែន និងកងកម្លាំងសម្ព័ន្ធមិត្តផ្សេងទៀត មិនបាញ់ប្រហារទៅវិញទៅមកជាមួយកងទ័ពរុស្ស៊ី លោកឧត្តមសេនីយ៍ឯក Kellogg បាននិយាយថា តំបន់ការពារមួយ នឹងត្រូវការជាចាំបាច់។

តែយ៉ាងណាក្ដី លោកឧត្តមសេនីយ៍ឯក Kellogg បានទទួលស្គាល់ថា សំណើនេះ «ប្រហែលជាមិនត្រូវបានទទួលយក» នោះឡើយពីសំណាក់ប្រធានាធិបតីរុស្ស៊ី លោក Vladimir Putin ដែលបានបញ្ជាឲ្យមានការលុកលុយទ្រង់ទ្រាយធំលើប្រទេសអ៊ុយក្រែន ក្នុងខែកុម្ភៈ ឆ្នាំ២០២២៕