រដ្ឋមន្ត្រីការបរទេសនូវែលសេឡង់ លោក Winston Peters នៅថ្ងៃអាទិត្យ (ទី១៣ ខែមេសា) នេះ បាននិយាយថា ប្រទេសរបស់លោកត្រូវការសហរដ្ឋអាមេរិកបន្តពាក់ព័ន្ធជាដៃគូ «ដ៏សកម្ម» នៅតំបន់ឥណ្ឌូប៉ាស៊ីហ្វិក បន្ទាប់ពីបានធ្វើដំណើរទៅកាន់ទីក្រុងវ៉ាស៊ីនតោន កាលពីខែមុន ដើម្បីពង្រឹងទំនាក់ទំនងជាមួយរដ្ឋបាលរបស់ប្រធានាធិបតី លោក Donald Trump។

នូវែលសេឡង់ និងសហរដ្ឋអាមេរិក បានធ្វើការរួមគ្នានៅតំបន់ប៉ាស៊ីហ្វិក ដើម្បីទប់ទល់នឹងឥទ្ធិពលដែលកំពុងកើនឡើងរបស់ប្រទេសចិន ប៉ុន្តែមានក្ដីបារម្ភក្នុងចំណោមសមាជិកសភាមួយចំនួន នៅក្នុងប្រទេសនូវែលសេឡង់ អំពីអ្វីដែលថា ការផ្លាស់ប្តូររបស់ទីក្រុងវ៉ាស៊ីនតោន និងការផ្អាកការផ្តល់ជំនួយរបស់រដ្ឋបាលនេះ នឹងប៉ះពាល់ដល់តំបន់នេះយ៉ាងដូចម្ដេច។

អំឡុងពេលថ្លែងនៅឯទីក្រុង Honolulu រដ្ឋ Hawaii ក្នុងដំណើរបំពេញទស្សនកិច្ចនៅប៉ាស៊ីហ្វិករយៈពេលមួយសប្តាហ៍ដោយក្រុមអ្នកនយោបាយនូវែលសេឡង់ លោក Peters បាននិយាយថា សារដែលលោកបានយកទៅនិយាយប្រាប់សហរដ្ឋអាមេរិក គឺថា «នូវែលសេឡង់ចង់បាន ពោលគឺពិតជាត្រូវការណាស់ ឲ្យសហរដ្ឋអាមេរិកបន្តនៅតែជាដៃគូដ៏សកម្ម ជាប់ពាក់ព័ន្ធ និងប្រកបដោយការស្ថាបនា នៅក្នុងតំបន់ឥណ្ឌូប៉ាស៊ីហ្វិក»។

នៅទីក្រុងវ៉ាស៊ីនតោន លោក Peters បានជួបជាមួយរដ្ឋមន្ត្រីការបរទេសអាមេរិក លោក Marco Rubio ទីប្រឹក្សាសន្តិសុខជាតិ លោក Mike Waltz ប្រធានការិយាល័យជំនួយការបរទេសរបស់សហរដ្ឋអាមេរិក លោក Peter Marocco និងក្រុមតំណាងរដ្ឋបាល និងតំណាងរាស្ត្រដទៃទៀត៕