នាយកដ្ឋានឧតុនិយមរបស់ប្រទេសថៃ បានរាយការណ៍ថា រញ្ជួយដីកម្រិតស្រាល ៥,៩រ៉ិចទ័រ បានកើតមាននៅសហភាពមីយ៉ាន់ម៉ា នាព្រឹកថ្ងៃអាទិត្យ (ទី១៣ ខែមេសា) នេះ។

អង្គភាពសង្កេតគ្រោះរញ្ជួយដីរបស់នាយកដ្ឋាននេះ បានបញ្ជាក់ថា រញ្ជួយដីបានកើតឡើងក្នុងជម្រៅ ១០គីឡូម៉ែត្រ នៅវេលាម៉ោង ៩:២៤នាទីព្រឹក (ម៉ោងនៅប្រទេសថៃ)។ អង្គភាពនេះ បានបន្ថែមថា ចំណុចកណ្តាលនៃការរញ្ជួយមានចម្ងាយប្រហែល ២៧១គីឡូម៉ែត្រ នៅភាគពាយព្យខេត្ត Mae Hong Son (ម៉ែហងសន) របស់ប្រទេសថៃ។

រញ្ជួយដីនេះ ត្រូវបានគេរាយការណ៍ថា ក៏ផ្ដល់អារម្មណ៍ញ័រផងដែរដល់អ្នកស្រុក នៅខេត្ត Chiang Mai (ឈៀងម៉ៃ) និង Chiang Rai (ឈៀងរ៉ាយ) របស់ថៃ។ នៅទីក្រុងឈៀងម៉ៃ ប្រជាជននៅជាន់ទី៧ នៃខុនដូមួយក្នុងតំបន់ Tambon Suthep ស្រុក Muang បានរាយការណ៍ថា មានអារម្មណ៍ញ័រតិចៗ ហើយបានកត់សម្គាល់ឃើញចង្កៀងជាប់ពិដានយោលយ៉ាងស្រាលៗ។

នៅតំបន់ Tambon Thasud ស្រុក Muang នៃខេត្ត Chiang Rai អ្នកស្រុកនៅផ្ទះសំណាក់ Kemintra ក៏បានរាយការណ៍ថា មានអារម្មណ៍ញ័រតិចៗ ហើយឃើញគ្រែរង្គើ។ ជាមួយគ្នានេះ នាយកដ្ឋានរាយការណ៍បន្ថែមថា រញ្ជួយដីកម្រិត ១,៨រ៉ិចទ័រ បានកើតឡើងនៅតំបន់ Tambon Mae Na Toeng នៃស្រុក Pai របស់ខេត្ត Mae Hong Son នៅវេលាម៉ោង ៩:៤២ព្រឹក៕